Антикор Түркістандағы мемлекеттік сатып алу кезіндегі олқылықтарды анықтады

Фото: ашық дереккөз

Түркістан облысында автомобиль жолдарын салу және жөндеу процестерін талдау барысында бәсекелестікке қайшы тәсілмен 2,2 млрд теңгеге негізсіз шарттар жасасу фактілері анықталды, деп хабарлады qandastar.kz

Антикор мәліметінше, әкімдіктер төтенше жағдайлардың салдарын жою немесе зияткерлік меншік объектілерін сатып алу қажеттілігі сылтауымен нақты мердігерлерді іріктеп алған. Бұл конкурстық процедураларды айналып өтуге және жұмыс тәжірибесі мен ресурстары жоқ фирмаларға артықшылық беруге мүмкіндік берді.

Бұл ретте орташа жөндеу жүргізуге арналған сметаға күтпеген шығыстарға арналған шығындар негізсіз енгізіліп, бұл жұмыстардың 177 млн теңгеге қымбаттауына алып келді. Сонымен қатар, жергілікті атқарушы органдар талап етілмеген жобалау-сметалық құжаттама әзірлеуге 210 млн теңге жұмсады, – делінген Антикор хабарламасында.

Талдау қорытындысы бойынша мемлекеттік сатып алу рәсімдерінің бұзылуына жол берген кінәлі адамдар жауапкершілікке тартылып, Түркістан облысының әкімдігі жолдарды орташа жөндеу бойынша күтпеген шығыстарды алып тастады.

Сондай-ақ  halyq-uni.kz қаржыландыру бөлінбестен жобалау-сметалық құжаттама әзірлеуге жол бермейтін заңнамалық өзгерістерге бастамашылық жасағанын жазды.