«Ár balaǵa 70 myń teńgeden berý qajet»: Qazaqstandyq tanymal tulǵalar balany 12 jasqa deıin qaraýsyz qaldyrmaý týraly usynysqa oıyn aıtty

Foto: stan.kz

Taıaýda elimizde balalardy 12 jasqa deıin eresekterdiń qaraýynsyz qaldyrýǵa zańmen tyıym salý usynyldy, dep jazdy qandastar.kz

Stan.kz tilshisine qazaqstandyq senat depýtattary, BAQ ókilderi jáne shoý-bıznes ókilderi buǵan qatysty oıyn jetkizdi. Biri zańdy engizbes buryn júıeli zertteý qajet ekenin aıtsa, ekinshileri áleýmettik osal toptaǵy otbasylardyń jaǵdaıy túzelmeı qoǵamda rettilik bolmaıdy deıdi. Sonymen qatar balany josparlaý kezinde-aq ata-analarǵa kóp jaýapkershilik artylatynyn eskertti.

Foto: Stan.kz kollajy

“Bala sanyna qaramaı 70 000 teńge mólsherinde járdemaqy tólenýi kerek”

Aıta ketsek, jaqynda bala quqyqtary jónindegi ýákil Dınara Zákıeva 2024 jyldyń qańtarynan beri balalardyń ómirin qıǵan 15 órt oqıǵasy tirkelgenin aıtty. Kóp jaǵdaıda balalar úıde jalǵyz qalǵan eken. Osyǵan baılanysty ol 12 jasqa deıingi balalardy eresekterdiń qaraýynsyz qaldyrýǵa tyıym salýdy jáne muqtaj otbasylarǵa memlekettik kómek kórsetýdi usyndy.

Májilis depýtaty Gaýhar Tanasheva – elimizdegi analar men balalardyń quqyqtaryn qorǵap júrgen jandardyń biri. Halyq qalaýlysynyń aıtýynsha, máseleniń saldarymen emes, sebepterimen kúresýimiz qajet.

«Balanyń qaýipsizdigi barlyǵynan mańyzdy, alaıda eresek adamnyń úıde, balalardyń qasynda bolýy úshin olardyń ómir súrýge jetkilikti qarajaty men jaǵdaıy bolýy qajet. Osy jaqynda ǵana Astanada órtten bolǵan qaıǵyly jaǵdaıdy mysalǵa alsaq, balalardyń anasy jalǵyzbasty, ózi kópbalaly, turyp jatqan jerlerinde jaǵdaı jasalmaǵan. Nege ondaı jerde turǵan deseńizder, ol jer arzan. Tórt balany ózi jalǵyz asyraǵan, kúni boıy jumysta, óıtkeni balalarǵa beriletin járdemaqy jetpeıdi. Sol sebepti balalardy 13 jastaǵy úlken balasyna tapsyryp ketken. Eger de bul otbasyǵa aıyna jetkilikti járdemaqy tólenip, jaǵdaıy durys úıde turǵanda analary balalarynyń qasynda bolyp, olardyń qaýipsizdigine jaýapty bolýshy edi…», – dedi Gaýhar Tanasheva.

Foto: Qazaqstan baspasóz klýby

Gaýhar Tanasheva mundaı qaıǵyly jaǵdaılar qaıtalanbas úshin, tipten, bolmaýy úshin kópbalaly otbasylardy, jalǵyzbasty analardy qoldaý kerek ekenin aıtady.

«Buryn aıtqanymdaı, ár balaǵa bala sanyna qaramaı 70 000 teńge mólsherinde járdemaqy tólenýi kerek. Sonda ǵana analar árdaıym balalarynyń janynda bolyp, olarǵa ózderi qamqor bolyp, qarap, baqylap otyrady. Otbasylardyń onsyz da máseleleri óte kóp, tóleıtin kredıtteri bar, úı máselesi degendeı. Bul otbasylar ıpoteka alýǵa daıyn, biraq alý joldary óte qıyn. Sol úshin qoldanystaǵy ıpotekalyq baǵdarlamalardy qaıta qarastyryp, nesıe alý rásimderin jeńildetip, qoıylatyn talaptardy azaıtý kerek. Úkimettiń taktıkasy durys emes. Bir jaǵynan kópbalaly otbasylar «masyl», jumys istesin dese, endi jumys istep jatqandarǵa shara qoldanamyz deıdi«, – dedi Gaýhar Tanasheva.

«Quqyq ta, zań da adamnyń múmkindiginen asyp ketpeýge tıis»

Jýrnalıst, qoǵam belsendisi Dına Tólepbergen balanyń taǵdyry ata-ananyń ǵana emes, qoǵamnyń da jaýapkershiliginde ekenin atap ótti. Onyń aıtýynsha, 12 jasqa deıingi balalardy qaraýsyz qaldyrmaý týraly zań qajet, biraq bul ata-analarǵa úlken jaýapkershilik júkteıdi.

Foto: Dına Tólepbergenniń jelidegi paraqshasynan

«Eger sol balanyń amandyǵy úshin ana nemese áke úıde otyryp, jumysynan aıyrylýǵa májbúr bolsa, olarǵa memleket tarapynan qarjylaı qoldaý kórsetilýge tıis. Bul – otbasynyń qarjylyq turaqtylyǵyn saqtaý úshin ótemaqy nemese járdemaqy tóleýdi talap etetin zań. Qarjylyq múmkindikterdi eskermeı engizilgen zań ádiletsizdikke aınalady jáne otbasy úshin sheshim emes, kerisinshe qıyndyq týǵyzady. Bala – eldiń erteńi, ulttyń bolashaǵy. Zań ádil bolsyn desek, otbasynyń jaǵdaıyn oılap, ár ata-ananyń úmitin tirek etýimiz kerek. Quqyq ta, zań da adamnyń múmkindiginen asyp ketpeýge tıis», – dedi Dına Tólepbergen.

Estrada ánshisi Qaraqat Ábildına – búginde 6 balany tárbıelep otyrǵan kópbalaly ana. Ol, kerisinshe, 12 jasqa deıin balalardy qaraýsyz qaldyrýǵa bolmaıtynyn aıtady.

“Túsinbeımin, balany qaraýsyz qalaı tastap ketýge bolady? 12 jas turmaq, úlken uldaryma deıin baqylaımyn. Qazir osy “táıt, táıt” aıtyp, jıi baqylaý jasaýmen otyramyz. Úıdegi beınebaqylaý kamerasyn telefonǵa jalǵap qoıǵanbyz. Syrtta, gastrolde júrgende de “kim shyqty, kim kirdi, neshede uıyqtady, kim ne istep jatyr, tamaqty qalaı ishti?” dep qarap otyramyz. Shynymen, qazirgi tehnologııanyń damyǵan ýaqytynda osy yńǵaıly bolyp otyr. Bala degen, qaıtken kúnde de balalyǵyn jasaıdy. Onyń ústine bala ata-anasy shyǵyp ketkende erkindikti sezedi. Balanyń kóp isinde shalalyq bar. Bul jerde úlkenderden suralýy kerek. Mundaı kezde ata-analarǵa qandaı da bir shara qoldaný durys shyǵar dep oılaımyn. Sebebi basqalarǵa sabaq bolatyndaı, qaıtalanbaıtyndaı etip jazalaý kerek”, – dedi Qaraqat Ábildına.

Foto: Qaraqat Qydyráliniń jelidegi paraqshasynan

Qaraqat Ábildına úıdegi úlkender balaǵa kishkentaı kezinen bastap jalǵyz qalǵanda qaýipti jaǵdaıdardan qalaı saqtaný kerek ekenin úıretýi kerek deıdi. Mysaly, qoly kúıip qalǵanda, aıaq-astynan qulap qalsa, bir-birine alǵashqy kómek berýdi bilýi qajet ekenin eskertedi.

«Balaǵa degen jaýapkershilik ony josparlaýdan, kótergennen bastalady»

Medıamenedjer Láılá Sultanqyzy mundaı zań shyqsa, bul ata-anany jipsiz baılaý dep oılaıdy. Degenmen ol bul ekinshi jaǵynan mundaı máseleniń aldyn alyp, kúrespesek taǵy bolmaıdy dep otyr.

«Balanyń ómiri oıynshyq emes. Buryndary otbasylar bala-shaǵasyn jalǵyz qaldyrmaý úshin jaqyndarynan, baýyrlarynan kómek suraǵan. Bir úıdiń balasy, ekinshi úıdiń balasymen oınap júrip ósken. Menińshe, qazir de kelisýge bolady. Aqshalaı bermese de, balalardy kezek-kezek qarap tursa, mysaly… Kishkentaı kezinen ul-qyzdarǵa anany bolmaıdy, mynany bolmaıdy dep qana shekteı bermeı, ne úshin bolmaıtynyn, qaýip nede ekenin ashyq túsindirip, kórsetken jón dep oılaımyn», – dedi jýrnalıst Láılá Sultanqyzy.

Foto: Láılá Sultanqyzynyń jelidegi paraqshasynan

Láılá Sultanqyzy oqys oqıǵa degen otbasy, adam, jaǵdaı talǵamaıtynyn aıtady. Onyń sózinshe, kez kelgen úıdiń balasy jalǵyz qalyp, osyndaı jaǵdaıda zardap shegýi múmkin.

«Biz qazir saldarymen kúresip jatyrmyz. Sebepten bastasaq eken… Ol degenimiz jaýapkershilikke úırený, úıretý. Balaǵa degen jaýapkershilik ony josparlaýdan, kótergennen bastalady. Sanaly túrde ata-ana bolǵan juptar onyń qandaı júk ekenin sezedi», – dedi Láılá Sultanqyzy.

Foto: Medeý Arynbaevtyń jelidegi paraqshasynan

Al estrada ártisi Medeý Arynbaev aınalyp kelgende munyń bári áleýmettik jaǵdaıǵa kelip tireletinin basa aıtty.

“Áleýmettik jaǵdaıymyzdy qalypqa keltirgende ǵana órkenıetti el bolyp, tabysymyz arta túsedi. Sol kezde bári óz ornyna kele qoıyp, joıylady. Otbasynda tabys kózi júıeli túrde túsip tursa ǵana tálim-tárbıege kóńil bólinedi. Sóıtip mádenıetke, ıdeologııaǵa jáne damýǵa ýaqyt tabylady. Árıne, bul jerde ata-analardyń da jaýapkershiligin bóle qaraýǵa bolmaıdy. Ata-analar da – qoǵamnyń bir bólshegi. Osy tusta “balalar nelikten qaraýsyz qalyp, ólip jatyr?” degen suraq týyndaıdy. Bári – osy áleýmettik jaǵdaıdyń tómen bolýynyń saldary. Osylaı barlyq másele biriniń artynan biri tizbektelip kete beredi. Al ol ata-analarǵa suraq qoısań, “biz qaıtemiz, basqa amalymyz joq” dep qynjylady. Bul bitpeıtin dúnıe…”, – dep sózin qorytyndylady Medeý Arynbaev.

«Qystyń qamyn jaz oıla»

Osy rette senat depýtaty Gennadıı Shıpovskıh zańdy engizbes buryn qoǵam talqysyna salý kerek ekenin naqtylady. Onyń aıtýynsha, jergilikti organdar halyqpen etene jaqyn baılanysta bolǵanda ǵana mundaı qaıǵyly oqıǵalar azaıady.

«Balany jalǵyz qaldyrý, qaldyrmaý ekitalaı dúnıe. Sebebi ár otbasynyń jaǵdaıy ártúrli bolýy múmkin. Ekinshiden, árbir óńirdiń óziniń ereksheligi bar. Úshinshiden, árbir ata-ananyń túrli múmkindikteri bolýy múmkin. Sondyqtan biz munyń bárin júıeleı otyryp, sheshim shyǵarýymyz qajet. Máselen, ońtústik óńirlerde kún, árıne, jyly bolyp keledi. Bilesizder, soltústikte qarashadan bastap, sáýir aılaryna deıin kún qatty sýyq bolady. Soǵan sáıkes ot ta jıi jaǵylady. Mundaı aıtylǵan usynystardyń bárin halyqpen aqyldasyp, túrli sarapshynyń pikirin tyńdaı otyryp jáne túrli óńirlerdiń erekshelikterin negizge alyp qana qabyldanǵan jón dep oılaımyn», – dedi senat depýtaty Gennadıı Shıpovskıh.

Senat depýtaty keıbir ata-analar jaqsy ómirden balalaryn úıge tastap, jumysqa shyqpaıtynyn atap ótti. Otbasynda túrli jaǵdaılar bolýy múmkin ekenin de eske saldy.

Foto: Instagram / gennadiishipovskikh

Senator Gennadıı Shıpovskıh balalardyń qaýipsizdigi úshin jergilikti bılik pen tótenshe jaǵdaılar qyzmeti úılerdi tekserip, órt qaýipsizdigine erekshe nazar aýdarýy kerek ekenin aıtty. Ásirese, áleýmettik osal toptardyń úılerinde qaýipsizdik sharalaryn qatań saqtaý jáne aldyn alý jumystaryn ýaqytyly júrgizý mańyzdy ekenin atap ótti. Ol turǵyndarmen tyǵyz baılanysta bolyp, qaýipsizdik boıynsha túsindirý jumystaryn kúsheıtýdi usyndy.

Jergilikti organdar mundaı máselelerge den qoıyp aýdarsa, qaıǵyly jaǵdaıdar azaıar edi. Bizde «qystyń qamyn jaz oıla» deıdi. Máselen, qystyń ýaqyty jaqyndap kele jatqan kezde ýákiletti mekemeler revızııalyq, aýdıt jumystaryn erterek bastap, tekserýge tıis. Ár úıdi aralap, qaýipsizdik sharalaryn uıymdastyrý qajet», – dedi senat depýtaty Gennadıı Shıpovskıh.