«Araltuz» zaýytynda jumys istegen áıel kóz janarynan aıyryldy

Qyzylorda oblysynda zaýytta aýyr jaraqat alyp, kórý qabiletinen aıyrylǵan áıelge «Araltuz» AQ moraldyq shyǵyn retinde 5 mıllıon teńge tóleýge mindetteldi, dep habarlaıdy Qandastar.kz

Sottyń málimetinshe, Jaqsyqylysh aýylynyń turǵyny 2013 jyldan beri «Araltuz» AQ-nyń tuz óńdeý ehynda oraýshy bolyp jumys istegen. 2021 jyly ol eh operatory qyzmetine aýystyrylady.

2025 jyldyń qańtarynda túngi aýysym kezinde dúken qoımasynda operatordy tuz tasymaldaıtyn júk kótergish qaǵyp ketken. Áıel aýyr jaraqat alǵan. Oǵan birneshe márte ota jasalyp, saldarynan kórý jáne qozǵalý múmkindiginen aıyrylǵan. Qazir zardap shegýshige únemi syrttan kútim qajet, beti men kózine shuǵyl ota jasalýy kerek.

 «Jumys berýshiniń áreketinen eńbekke qabiletsiz bolyp qaldym. Densaýlyǵymnan aıyrylyp, psıhologııalyq kúızeliske tústim. Eki kishkentaı qyzym bar. Sol sebepti moraldyq shyǵyndy óteýdi suraımyn», — delingen talap aryzda.

Sotta óndiristik qyzmetpen baılanysty jazataıym oqıǵaǵa qatysty arnaıy tergeý aktisi qaraldy. Qujatqa sáıkes, jumys berýshiniń 100% kináli ekeni anyqtalǵan. Atalǵan fakti boıynsha Qylmystyq kodekstiń 156-baby 2-bóligimen qylmystyq is qozǵalyp, sotqa deıingi tergeý amaldary júrip jatyr.

AQ ókiliniń aıtýynsha, jaısyz oqıǵa abaısyzdyqtan oryn alǵan, «Araltuz» jábirlenýshige 850 myń teńge kóleminde materıaldyq kómek kórsetip, aldaǵy otalarǵa jumsalatyn barlyq shyǵyndy óz moınyna alǵan.

Sot isti qarap, áıeldiń psıhıkalyq jáne fızıkalyq azap shekkenin, densaýlyǵyna aýyr zııan keltirilgenin jáne qaıtalap ota qajet ekenin eskere otyryp, «Araltuz» AQ-ny moraldyq shyǵyn retinde 5 mıllıon teńge tóleýge mindettedi.