Маңғыстау – Семей бағытында қатынайтын №37 жолаушылар пойызында санитарлық жағдайға қатысты шағымдар түсті. Жолаушылар вагон ішінде тарақандардың жүргенін видеоға түсіріп, әлеуметтік желілерде жариялаған, дейді Qandastar.kz сайты Lada.kz порталына сілтеме жасап.
Бейнежазбада вагон ішіндегі жәндіктер анық көрінеді. Жолаушылар мұндай жағдайда жол жүру қолайсыз екенін айтып, пойыздағы тазалық талаптарының сақталуына қатысты наразылық білдірді. Кейбір азаматтар осындай жағдайларға басқа бағыттарда да тап болғандарын жеткізген.
Оқиғаға байланысты "Жолаушылар тасымалы" АҚ түсініктеме беріп, пойыз соңғы станцияға жеткеннен кейін вагондарға жоспардан тыс дезинсекциялық өңдеу жүргізілетінін мәлімдеді.
Компанияның мәліметінше, аталған вагон соңғы рет санитарлық талаптарға сәйкес 30 мамыр күні өңделген. Қолданыстағы нормалар бойынша жолаушылар вагондарына айына кемінде бір рет дезинсекция, ал тоқсанына бір рет дератизация жүргізілуі тиіс.
Қызметтік тексеру нәтижесінде бірқатар жауапты қызметкерлер тәртіптік жауапкершілікке тартылды. Олардың қатарында пойыз бастығы, өндірістік оқыту нұсқаушысы, Маңғыстау учаскесінің басшылығы және "Батыс" филиалының жетекшілері бар. Сондай-ақ вагонды рейске дайындауға жауапты комиссия мүшелері де жазаланды.
Оқиғаның мән-жайын жан-жақты анықтау үшін "Жолаушылар тасымалы" АҚ орталық аппаратынан арнайы комиссия жіберілді.
Компания жолаушылардан туындаған қолайсыздықтар үшін кешірім сұрап, вагондардың санитарлық жағдайын жақсарту және қызмет көрсету сапасын арттыру бойынша жұмыстар жалғасатынын хабарлады.