Премьер-министрдің орынбасары – Мәдениет және ақпарат министрі Аида Балаева Қазақстанда қайтыс болғаннан кейінгі донорлықты дамыту қажеттігін айтты. Оның пікірінше, бір адамның шешімі басқа біреуге өмір сүруге мүмкіндік беруі мүмкін. Бұл туралы Qandastar.kz хабарлады.
Министр бұл туралы Facebook парақшасында жазып, адам өмірі ең жоғары құндылық екенін атап өтті. Ол «Хабар» арнасында көрсетілген «4739» деректі фильмінен кейін трансплантация мәселесінің маңызын тағы бір түсінгенін жеткізді.
Аида Балаева қазіргі уақытта Қазақстанда 4739 адамның ағза трансплантациясын күтіп отырғанын, олардың арасында 125 баланың бар екенін айтты.
Министрдің мәліметінше, еліміздегі трансплантация операцияларының шамамен 90 пайызы тірі туыстық донорлардың қатысуымен жасалады. Ал қайтыс болғаннан кейінгі донорлық үлесі 10 пайызға да жетпейді.
Ол донор болу немесе болмау әр адамның жеке таңдауы екенін атап өтті. Бұл мәселені талқылау кезінде ағза күтіп отырған науқастардың жағдайын да, жақынынан айырылған отбасылардың қайғысын да ескеру қажет екенін айтты.
«Бұл тақырыпта қысым немесе айыптау болмауы керек. Ең бастысы – әр адамның таңдауы мен әр отбасының шешіміне құрметпен қарау», – деді министр.
Аида Балаева өз атынан да қайтыс болғаннан кейін ағзаларын донорлыққа беруге келісетінін мәлімдеді. Оның айтуынша, мұндай шешім өмір үшін күресіп жатқан адамдарға жаңа мүмкіндік сыйлауы мүмкін.
Министр қоғамда бұл тақырыпты қорқынышпен емес, түсіністікпен, жауапкершілікпен және адам өміріне деген құрметпен талқылау маңызды екенін атап өтті.