Air Astana Таяу Шығыстағы ахуалдың шиеленісуіне байланысты Дубай бағыты бойынша кейбір рейстерге өзгерістер енгізілгенін хабарлады. Бұл туралы Qandastar.kz мәлімдеді.
2026 жылғы 12 шілде күні сағат 07:10-да Астанадан Дубайға бағыт алған KC205 рейсі қауіпсіздік талаптарына байланысты межелі жеріне жете алмай, ұшып шыққан әуежайға қайта оралды.
Сонымен қатар, сол күні сағат 08:50-де орындалуы тиіс Алматы–Дубай бағытындағы KC897 рейсі тоқтатылды.
Әуе компаниясы аталған рейстердің жолаушыларына билеттердің толық құнын сатып алған жері арқылы қайтару мүмкіндігі берілетінін мәлімдеді. Алдағы рейстер кестесіндегі өзгерістер туралы қосымша ақпарат кейінірек жарияланады.
Air Astana жағдайды бақылауда ұстап, рейстердің тоқтап қалуына байланысты жолаушыларды тасымалдау мәселесін шешіп жатыр. Жолаушыларға ұшу мәртебесін үнемі тексеріп отыру ұсынылды.