Қазақстанда әйелін өлтіруге оқталды деген күдікке ілінген ер адамға қатысты сот шешімі шықты. Жәбірленушінің адвокатының айтуынша, оқиғаға қызғаныш себеп болған. Бұл туралы Qandastar.kz хабарлады.
Жәбірленушінің қорғаушысы Әйгерім Жомартқызының мәліметінше, ер адамға әйелінің опасыздығы туралы ақпарат жеткен. Сол себепті ерлі-зайыпты арасында жанжал туындаған. Адвокаттың айтуынша, ер адам кейін әйелін жұмысқа апара жатқан кезде көлікті адам аз жүретін жерге бұрып, оған қоқан-лоқы көрсеткен.
Қорғаушының сөзінше, ер адам алдын ала дайындаған сымды алып, әйелінің мойнын қыса бастаған. Әйел үш баласын ойлап, күйеуін сабырға шақыруға тырысқан. Белгілі бір уақытта ол есінен танып қалған болуы мүмкін. Кейін көлік маңынан өтіп бара жатқан адамның байқап қалғанын көрген күдікті әрекетін тоқтатқан.
Жәбірленушінің айтуынша, күйеуі болған жағдайды біреуге айтса, өлтіретінін айтып қорқытқан. Оқиғадан кейін әйелдің денсаулығы нашарлап, дауысы қарлығып, мойын аймағында жарақаттар болған.
Адвокаттың айтуынша, күдікті бастапқыда кінәсін мойындамаған. Ол тек әйелін қорқыту үшін қолымен қылқындырғанын айтқан. Кейін тергеу барысында өз кінәсін мойындағанымен, адам өлтіруге оқталу фактісін жоққа шығарған.
Қорғаушы бұл әрекетте адам өлтіруге оқталу және азаптау белгілері бар деп есептейді. Оның айтуынша, ерлі-зайыпты 10 жыл бойы жанжалмен өмір сүрген, әйел бұған дейін бірнеше рет полицияға жүгінген. Сондай-ақ ер адамға қорғау нұсқамасы шығарылған.
Сот барысында олардың 20 жастағы қызы да куәлік берген. Ол отбасындағы тұрақты жанжалдардан шаршағанын және үнемі қорқынышта өмір сүргенін айтқан. Адвокаттың мәліметінше, қыз бұған дейін әкесінің сөмкесіне пышақ салып жатқанын көргенін де жеткізген.
Қарасай аудандық сотының мәліметінше, сот материалдары бойынша ерлі-зайыптылар арасында көлікте жанжал болған. Кейін ер адам көлікті тоқтатып, әйелінің мойнын электр сымымен екі рет қысып, денесіне зақым келтірген. Сараптама нәтижесінде мойын аймағында жеңіл жарақаттар анықталған.
Сот ер адамды Қылмыстық кодекстің 109-1-бабы 1-бөлігі («Ұрып-соғу») бойынша кінәлі деп танып, 25 тәулікке қамау жазасын тағайындады. Бұл бап бойынша қарастырылған ең қатаң жаза саналады. Үкім әзірге заңды күшіне енген жоқ.
Жәбірленушінің адвокаты сот шешімімен келіспейтінін айтып, үкімге апелляциялық шағым беруді жоспарлап отыр. Оның пікірінше, күдіктінің әрекеттерінде тек ұрып-соғу емес, адам өлтіруге оқталу және азаптау белгілері де бар.