Парламент Мәжілісінде білім беру саласына қатысты маңызды заң жобасы талқыланып, депутаттардың дауыс беруімен қабылданды. Жаңа заңға сәйкес, бұған дейін облыстық білім басқармаларының құзырында болған мектептер мен балабақшаларды қаржыландыру және басқару саясаты қайтадан аудандық деңгейге берілмек. Енді бұл құжат Сенаттың қарауына жолданды. Бұл туралы Qandastar.kz сайты хабарлады.
Алайда бұл шешімді Мәжіліс депутаты, бұрынғы Білім және ғылым министрі Асхат Аймағамбетов шұғыл сыңға алып, оны «ең тиімсіз және ең қисынсыз шешім» деп атады. Депутаттың айтуынша, бұл өзгеріс 4 миллион баланың тағдырына тікелей және негативті әсер етуі мүмкін.
Асхат Аймағамбетов заң жобасына қарсылық танытуының басты себептерін былай түсіндірді:
-
Сапа мен кадр мәселесінің төмендеуі: Бұған дейін аудан әкімдіктеріне тек шаруашылық, жөндеу және материалдық-техникалық базаны реттеуді қалдыру ұсынылған. Алайда жаңа шешім бойынша, аудандарға білім бөлімдері мен мектеп директорларын тағайындау, оларды ротациялау, әдістемелік жұмыстар мен білім сапасын бақылау секілді маңызды құзыреттердің барлығы тұтас беріліп отыр.
-
Сыбайлас жемқорлықтың қайта өршуі: Депутат бұл жүйенің өткен жылдардағы тиімсіз тәжірибеге қайта оралу екенін ескертті. Мұғалімдерді жұмысқа алудағы тамыр-таныстық пен сыбайлас жемқорлық мәселелері қайта бас көтеруі мүмкін. Сонымен қатар, мұғалімдерді қайтадан «массовкаға» және жиналыстарға негізсіз тарту қаупі жоғары.
-
Бюджет тапшылығы мен бақылаудың қиындауы: «Бізде 20 бюджетті тексеріп, қадағалау оңай ма, әлде 220 бюджетті тексеру оңай ма?» — деп сұрақ қойды депутат. Оның айтуынша, дотацияда отырған, өз бюджеті аз кейбір аудандарда ертең мұғалімдердің жалақысы, еңбек демалысының ақшасы жетпей қалатын немесе оқулықтар тапшы болатын бұрынғы қиын жағдайлар қайталануы мүмкін. Бұған ешкім кепілдік бере алмайды.
Депутат бұл мәселенің бірнеше апта бұрын ашық талқыланғанын, бірақ сарапшылар мен мамандардың уәждері ескерілмей, шешімнің «үн-түнсіз» қабылданып кеткеніне қынжылыс білдірді. Білім беру саласындағы бұл реформаның тиімділігін енді уақыт көрсетеді, алайда маман ретінде Аймағамбетовтың дабыл қағуы негізсіз емес.
[embed]https://www.tiktok.com/@adal_adam/video/7647138671056915732?is_from_webapp=1&sender_device=pc[/embed]