Ақтөбе облысында бұрынғы танысын интимдік сипаттағы бейнежазбаларды жариялаймын деп қорқытып, бопсалады деген күдікпен 38 жастағы ер адам ұсталды. Бұл туралы Qandastar.kz сайты хабарлады.
Полицияның мәліметінше, қала тұрғыны құқық қорғау органдарына арызданған. Оның айтуынша, бұрын бірге жүрген танысы келісімінсіз түсірілген интимдік бейнежазбаларды тарататынын айтып, психологиялық қысым көрсеткен.
Жедел-іздестіру шаралары барысында күдіктінің жеке басы анықталып, ұсталды. Ол көршілес облыстың 38 жастағы тұрғыны болып шықты.
Аталған дерек бойынша жеке өмірге қол сұғушылық белгілерімен сотқа дейінгі тергеу басталды. Күдікті уақытша ұстау изоляторына қамалып, қазіргі уақытта оқиғаның барлық мән-жайын анықтауға бағытталған тергеу амалдары жүргізіліп жатыр. Сонымен қатар оның басқа да құқыққа қайшы әрекеттерге қатысы бар-жоғы тексерілуде.
Полиция азаматтарға жеке өмірге қатысты материалдарды тарату немесе оны жариялаймын деп қорқыту заңмен жазаланатынын ескертіп, мұндай жағдайға тап болған жағдайда бірден құқық қорғау органдарына жүгінуге шақырды.