ҚР Әділет министрлігіне қарасты Мәжбүрлеп орындату комитетінің төрағасы Мақсат Балабеков 2026 жылғы 26 наурызда Орталық коммуникациялар қызметінде өткен брифингте алимент төлеушілердің табысын жасыру фактілеріне қарсы бақылау күшейтілетінін мәлімдеді. Бұл туралы Qandastar.kz сайты Zakon.kz порталына сілтеп хабарлады.
Оның айтуынша, алимент өндіріп алудағы негізгі қиындықтардың бірі – азаматтардың нақты табысын толық көрсетпеуі. Көп жағдайда олар ресми түрде ең төменгі жалақыны ғана көрсетіп, соның негізінде алимент төлейді.
Балабеков қазіргі таңда бұл мәселені шешу үшін мемлекеттік органдар арасындағы ақпарат алмасу күшейтіліп жатқанын атап өтті. Атап айтқанда, Еңбек және Қаржы министрліктерімен, сондай-ақ Мемлекеттік кірістер комитетімен бірлесіп, азаматтардың табысы мен келісімшарттары туралы қосымша деректерді алу жоспарлануда. Бұл нақты кірісті анықтап, сот арқылы алиментті дұрыс есептеуге мүмкіндік береді.
Сонымен қатар, биыл басқа да мемлекеттік органдармен ақпараттық жүйелерді біріктіру көзделіп отыр.
Еске салайық, бұған дейін Астанада ата-аналардың 2,7 миллиард теңге көлеміндегі алимент қарызы өндірілмегені туралы ақпарат тараған еді.