Алматыда Қазақстандағы алғашқы крематорий өз жұмысын бастады. Бұл туралы қала әкімдігіне сілтеме жасаған Qandastar.kz хабарлады. Жаңа нысан Қоғамдық денсаулық сақтау басқармасына қарасты Қалалық патологоанатомиялық бюроның қарауына берілген.
Кремация қызметі енді дәстүрлі жерлеуге балама ретінде ұсынылады. Бұл тұрғындарға өздерінің мәдени, діни және жеке ұстанымдарына сәйкес таңдау жасауға мүмкіндік береді.
Кешен Чехияда өндірілген заманауи жабдықтармен жабдықталған. Онда көпсатылы сүзгі жүйесі бар екі кремациялық пеш орнатылған. Екі камералы технология түтін газдарының толық жануын қамтамасыз етіп, зиянды шығарындыларды азайтады, сондай-ақ иіс пен көзге көрінетін түтіннің таралуына жол бермейді.
Бір кремация рәсімі шамамен екі сағатқа созылады. Ал пештерді қажетті температураға дейін қыздыру процесі 35 сағатқа дейін уақыт алады. Толық жүктемеде әр пеш тәулігіне 8 рәсімге дейін орындауға қабілетті.
Кремация процесі бірнеше кезеңнен тұрады: мәйітті қабылдау, міндетті түрде сәйкестендіру, кремация жүргізу, күлді өңдеу және оны туыстарына тапсыру. Әрбір кезең қатаң бақылауда болып, барлық рәсімдер тиісті құжаттармен рәсімделеді.
Крематорийде қоштасу рәсімдерін өткізуге арналған арнайы залдар қарастырылған. Сонымен қатар, туыстарға рәсім барысын арнайы бөлмеден бақылауға мүмкіндік беріледі.
Әкімдік мәліметінше, мекеме қызметкерлері шетелде арнайы дайындықтан өткен. Мәйіттермен жұмыс істеу барысында санитарлық талаптар, кәсіби этика және құрмет қағидалары қатаң сақталады.
Қысқасы, қалада енді «таңдау жоқ» деген классикалық сценарийдің орнына бір опция пайда болды. Адамдар өмір бойы шешім қабылдай алмай жүріп, ең соңында да таңдау беріліп отыр. Қызық парадокс, бірақ пайдалы.