Алматыда жеңіл рельсті көлік (LRT) желісінің құрылысына байланысты Момышұлы көшесінің бір бөлігінде көлік қозғалысына уақытша шектеу енгізіледі. Бұл туралы Qandastar.kz сайты қала әкімдігіне сілтеме жасап хабарлады.
Қала әкімдігінің мәліметінше, құрылыс жұмыстары жүргізілетін кезеңде Мөңке би көшесі мен Төле би көшесінің аралығындағы учаскеде жолдың ортасындағы екі жолақ жабылады. Бұл өзгерістер көлік қозғалысын ұйымдастыру және құрылыс жұмыстарының қауіпсіздігін қамтамасыз ету мақсатында қолға алынған.
Сондай-ақ аталған аралықта қоғамдық көлікке арналған арнайы жолақ уақытша жұмысын тоқтатады. Билік өкілдерінің айтуынша, осы кезеңде арнайы жолақпен жүрген көліктерге бейнебақылау камералары арқылы айыппұл салынбайды.
Әкімдік жүргізушілерге қозғалыс бағытын алдын ала жоспарлап, аталған аумақта кептелістер мен қозғалыстың қиындауы мүмкін екенін ескеруді ұсынды.
Жобаға сәйкес, LRT желісінің алғашқы кезеңі Момышұлы көшесі, Төле би көшесі және Абылай хан даңғылы арқылы өтіп, «Алматы-2» теміржол вокзалына дейін жалғасады.
Ал жеңіл рельсті көлікке қызмет көрсететін депо Алатау ауданындағы Индустриялық аймақтың оңтүстік бөлігінде орналасады. Жобаның бірінші кезеңінің жалпы ұзындығы 18,3 шақырымды құрайды.