18 маусымнан бастап Алматы қаласының бірнеше көшесінде көлік қозғалысының жаңа схемасы енгізілді. Қала әкімдігінің мәліметінше, өзгерістер жолдағы кептелісті азайту және қозғалыс қауіпсіздігін арттыру мақсатында пилоттық режимде жүзеге асырылып жатыр. Бұл туралы Qandastar.kz сайты хабарлады.
Жаңа тәртіпке сәйкес, Достық даңғылында Гоголь көшесінен Жібек жолы даңғылына дейінгі аралықта қозғалыс тек солтүстік бағытта ұйымдастырылады. Сондай-ақ Зенков көшесінде Мақатаев көшесінен Гоголь көшесіне дейін көліктер тек оңтүстік бағытта жүре алады. Бұдан бөлек, Атамекен көшесінің №103 үйден №108 үйге дейінгі бөлігінде де біржақты қозғалыс енгізіліп, көліктер оңтүстік бағытта қатынайды.
Әкімдік өкілдері пилоттық жоба нәтижесінде көлік ағынының тиімділігі бағаланып, қажет болған жағдайда қосымша өзгерістер енгізілетінін атап өтті. Жүргізушілерге жаңа жол белгілеріне назар аударып, қозғалыс бағытын алдын ала жоспарлау ұсынылды.