Amanat пен "Әділет" партияларының бірігуі туралы шешімнен кейін Мәжіліс депутаттары бұл қадамның мәні мен мақсатына қатысты пікір білдірді. Алайда олардың көзқарастары бірдей болған жоқ. Бұл туралы Qandastar.kz сайты хабарлады.
Amanat партиясының төрағасы, Мәжіліс спикері Ерлан Қошанов бұл бірігуді бұрынғы саяси кезеңмен қоштасу ретінде қабылдау дұрыс емес екенін айтты. Оның сөзінше, партиялар өткенге емес, болашаққа бағдар ұстап, елдегі реформаларды жүзеге асыруға күш салуы тиіс. Сондай-ақ ол шешімнің қабылдануына екі партияның ұстанымдары, идеялары мен сайлаушыларының ұқсастығы себеп болғанын атап өтті.
Ал депутат Ерлан Саиров керісінше, бұл қадамды бұрынғы саяси жүйемен символикалық түрде толық қоштасу деп бағалады. Оның пікірінше, жаңа саяси кезеңге өту үшін ескі жүйенің ықпалынан толық арылу қажет.
Өз кезегінде депутат Асхат Аймағамбетов мұндай шешімнің ерте ме, кеш пе қабылданатыны белгілі болғанын айтты. Ол партиялардың бірігуін саяси күштер мен ресурстарды шоғырландыруға бағытталған қадам ретінде бағалап, бұл бастаманы съезд делегаттары бірауыздан қолдағанын жеткізді.
Еске салайық, Amanat партиясы жуырда "Әділет" партиясының өз құрамына қосылатынын жариялаған болатын. Ерлан Қошановтың айтуынша, партия қоғам сұранысы мен мемлекет мүддесіне сай дамудың жаңа кезеңіне қадам басып отыр.