Мәжіліс депутаты Асхат Аймағамбетов Astana Marathon жарысына қатысып, іс-шарадан алған әсерімен бөлісті. Бұл туралы Qandastar.kz сайты хабарлады.
Оның айтуынша, марафон жоғары деңгейде ұйымдастырылып, мыңдаған адамды біріктірген ауқымды спорттық мерекеге айналған. Депутат жарыс барысында қалыптасқан ерекше атмосфераны атап өтіп, мұндай шаралардың бұқаралық спортты дамытудағы маңызы зор екенін айтты.
«Бүгін Astana Marathon-ға қатыстым. Керемет атмосфера, жоғары деңгейдегі ұйымдастыру, мыңдаған адам. Таңғы уақытта сұлу Астанамыздың көшелерімен жүгірудің өзіне тән ерекше вайбы бар екен. Спортпен айналысатын жандардың қатары көбейе берсін!» – деп жазды Асхат Аймағамбетов әлеуметтік желідегі парақшасында.
Astana Marathon дәстүрлі түрде кәсіби спортшыларды, әуесқой жүгірушілерді және салауатты өмір салтын ұстанатын азаматтарды бір алаңға жинайды. Жарысқа қатысушылар түрлі қашықтықтар бойынша бақ сынап, спорттық белсенділікті насихаттауға үлес қосты.
Ұйымдастырушылардың айтуынша, мұндай шаралар тұрғындарды дене шынықтырумен тұрақты айналысуға ынталандырып, қоғамда салауатты өмір салтын қалыптастыруға ықпал етеді.