Мазмұнға өту
qandastar.

Балқаш мыс балқыту зауытында 21 мың шаршы метрден астам шатыр жаңартылды

Бақытжан Мұса
Қазақмыс
Қазақмыс

«Kazakhmys Smelting» ЖШС Балқаш мыс балқыту зауытында өндірістік ғимараттардың шатырын жаңарту жұмыстары жалғасып жатыр. 2026 жылдың басынан бері 21 633 шаршы метр шатыр жөнделіп, жылдық жоспардың 79,2 пайызы орындалды. Бұл туралы Qandastar.kz сайты хабарлады.

Жөндеу жұмыстары өндірістік инфрақұрылымды жаңғырту бағдарламасы аясында жүргізілуде. Негізгі мақсат – ғимараттардың сенімділігін арттыру, пайдалану мерзімін ұзарту және жұмыскерлерге қауіпсіз еңбек жағдайын жасау.

Жұмыстың басым бөлігі мыс электролизі цехында атқарылуда. Бұл бағытқа 1,14 млрд теңгеден астам қаржы қарастырылған. Жоспарланған 12 103,4 шаршы метр шатырдың 9 551,4 шаршы метрі жаңартылды.

Атап айтқанда, цехтың бас корпусындағы алтыншы аралықтың 2 421 шаршы метр жұмсақ шатыры жөнделді. Сонымен қатар металл конструкциялар боялып, 752 шаршы метр жарық түсетін фонарьдың әйнегі ауыстырылды. Бак аралығында 3 624,4 шаршы метр шатыр жөнделіп, жаңа терезе блоктары орнатылды.

Сондай-ақ негізгі корпустың шатырына күрделі жөндеу жүргізіліп, нөсер су кәріз жүйесі ауыстырылуда. Қайта жаңғырту кезінде темірбетон плиталардың орнына заманауи сэндвич-панельдер орнатылып жатыр. Бұл ғимараттың көтергіш конструкцияларына түсетін салмақты азайтуға мүмкіндік береді.

2026 жылға жоспарланған 3 018 шаршы метр шатыр жабынының 2 754 шаршы метрі монтаждалды. Ал 2027 жылы тағы 3 040 шаршы метр шатырды жаңарту көзделген.

Жөндеу жұмыстарына күн сайын 50-60-қа жуық маман қатысады.

Компанияның мәліметінше, шатырларды жаңарту өндірістік нысандардың сенімділігін арттыруға, сондай-ақ кәсіпорынның тұрақты әрі қауіпсіз жұмысын қамтамасыз етуге бағытталған.

Бөлісу: Telegram WhatsApp