Дания Сыртқы істер министрі Ларс Лёкке Расмуссен Қазақстанды алдағы Тәуелсіздігінің 35 жылдығымен құттықтап, елдің осы кезеңде айтарлықтай жетістіктерге жеткенін атап өтті. Ол Данияның Қазақстанмен саяси диалогты нығайтып, сауда-экономикалық байланыстарды дамытуға мүдделі екенін айтты, деп хабарлайды Qandastar.kz.
– Қазақстан Орталық Азиядағы экономикасы ірі ел саналады. Мұнда Данияның көптеген компаниясы жұмыс істейді. Олар осы серіктестікті алдағы уақытта кеңейте түсуге қызығушылық танытып отыр, – деді Дания Сыртқы істер министрі.
Кездесу барысында Қасым-Жомарт Тоқаев пен Ларс Лёкке Расмуссен екіжақты ынтымақтастықты кеңейтудің перспективаларын талқылады.
Атап айтқанда, тараптар көлік-логистика, цифрлық трансформация, жасанды интеллект, аса маңызды минералдар, ауыл шаруашылығы және су қауіпсіздігі салаларындағы өзара іс-қимылды күшейту мәселелері бойынша пікір алмасты.