Әлеуметтік желілерде әлі ресми жарияланбаған “Мне стыдно” YouTube-шоуынан үзінділер тарағаннан кейін қазақстандық рэпер De Lacure төңірегінде дау туындады. Көпшілік музыканттың бағдарлама барысында айтқан оқиғасына құқықтық баға беруді талап етті. Бұл туралы Qandastar.kz сайты Tengrinews.kz порталына сілтеп хабарлады.
“Мне стыдно” — қонақтар өз өміріндегі ыңғайсыз немесе ерекше жағдайларды баяндайтын ойын-сауық формасындағы жоба. Көрермендердің айтуынша, рэпер түсірілім кезінде 2012 жылы болған оқиғаны айтып берген. Оның сөзінше, өзі және достары көмек сұраған әйелді кездестірген. Кейін достарының бірі әйелмен оңаша қалғаны, ал сыртта тұрғандар не болып жатқанын түсінгені айтылған. Осы оқиғадан кейін әлеуметтік желіде рэперге қатысты сын күшейді.
Алматы қалалық полиция департаменті бұл мәселеге байланысты тексеру жүргізілгенін хабарлады. Полиция мәліметінше, рэпер түсініктеме беру үшін жеткізіліп, айтылған оқиғаның шоу форматында баяндалған ескі жағдай екенін түсіндірген. Оның айтуынша, әлеуметтік желіде тараған ақпарат бұрмаланған және ешқандай зорлық-зомбылық болмаған.
Музыкант кейін бұл оқиға шамамен 15 жыл бұрын болғанын, ал әйел мен досының арасында бәрі өзара келісіммен өткенін мәлімдеді. Сонымен қатар ол зорлық-зомбылықтың кез келген түрін айыптайтынын айтып, сәтсіз оқиға таңдағаны үшін кешірім сұрады.
Полиция тексеру барысында қылмыстық құқықбұзушылықты дәлелдейтін нақты деректер анықталмағанын мәлімдеп, тексеру аяқталғанын хабарлады.
Даудың өршуіне комик Зарина Байболова де пікір білдірді. Оның айтуынша, түсірілім кезінде команда бірден дұрыс реакция көрсете алмаған. Кейін бағдарлама жарияланбайтын болып шешілген. Ол болған жағдайға байланысты көрермендерден кешірім сұрап, түсірілімді тоқтату қажет болғанын мойындады.