Германия канцлері Фридрих Мерц 4 қазанда Киевке жұмыс сапарымен барды. Сапар барысында Германия Украинаға 1 миллиард еуро көлемінде әскери көмек бөлуді және энергетика саласын қалпына келтіруге 350 миллион еуро бағыттауды жоспарлап отыр, деп хабарлайды Qandastar.kz.
Канцлердің сапары кезінде Киевте әуе дабылы қосылып, жарылыстар естілген. Украина астанасына жасалған шабуылдардың бірі Днепр өзені арқылы өтетін Солтүстік көпірге зақым келтірген. Киев мэрі Виталий Кличконың мәліметінше, көпірдің жол бөлігі мен жақын маңдағы ыстық су жүйесі зардап шеккен.
Фридрих Мерц Германияның Украинаға қолдауын жалғастыратынын мәлімдеді. Оның айтуынша, Ресейдің әскери әрекеттері Украина қалаларына, тұрғын үйлер мен энергетикалық нысандарға қауіп төндіріп отыр.
Сапар аясында екі елдің ұшқышсыз ұшу аппараттарын бірлесіп өндіру туралы келісім жасасуы күтілуде. Сонымен қатар тараптар 1 000 шақырымнан астам қашықтыққа ұшатын қару түрлерін бірлесіп әзірлеу және өндіру мәселесін талқыламақ.
Мерц Украина билігімен Еуропалық одақ қолдайтын реформалар, соның ішінде сыбайлас жемқорлыққа қарсы күрес мәселелерін де талқылайды.