Израиль президенті Ицхак Герцог премьер-министр Биньямин Нетаньяхудың басты саяси қарсыласы Гади Айзенкотқа жаңа үкімет құруды тапсырмақ. Бұл шешім елдегі парламенттік сайлаудан кейін қалыптасқан саяси тығырықтан шығуға бағытталған. Qandastar.kz сайты хабарлады.
27 қазанда өткен парламенттік сайлауда Нетаньяхудың діни-ұлтшыл коалициясы көпшілік орынға ие бола алмады. Оның жетекшілік ететін «Ликуд» партиясы 120 орындық Кнессетте 27 мандат алғанымен, коалиция жалпы 53 орынмен шектелді. Үкімет құру үшін кемінде 61 депутаттың қолдауы қажет.
Ал Гади Айзенкот бастаған коалиция 48 орынға ие болды. Израильдің араб азшылығын білдіретін екі партия парламенттен 19 орын алған. Олардың қолдауы Айзенкоттың үкімет құру мүмкіндігін арттыруы ықтимал.
Айзенкоттың алдында бірнеше саяси жол бар. Ол араб партияларының қолдауымен азшылық үкіметін құруға, ультраортодоксалды партиялармен келіссөз жүргізуге немесе Нетаньяхумен ұлттық бірлік үкіметін қалыптастыруға тырысуы мүмкін. Алайда сарапшылар бұл нұсқалардың жүзеге асуы екіталай екенін айтады.
Жаңа үкімет құруға Айзенкотқа 28 күн беріледі. Қажет болған жағдайда бұл мерзім тағы 14 күнге ұзартылуы мүмкін. Егер ол тапсырманы орындай алмаса, басқа кандидатқа мүмкіндік беріледі. Саяси келісімге қол жеткізілмеген жағдайда Израильде қайта сайлау өткізілуі мүмкін.
66 жастағы Гади Айзенкот – Израиль армиясының бұрынғы бас штабының бастығы. Ол 2022 жылы саясатқа араласып, 2023 жылғы 7 қазандағы ХАМАС шабуылынан кейін Нетаньяхудың әскери кабинетінде қысқа уақыт қызмет атқарған. Кейін оппозицияға оралып, премьер-министрдің Газа секторындағы әскери саясаты мен ел басқаруын сынға алған.
Айзенкот сонымен қатар палестиналықтарға қарсы қоныстанушылардың зорлық-зомбылығын айыптап, Нетаньяхудың оңшыл коалициялық серіктестеріне қарсы ұстаным білдірген.