«Қазақмыс» компаниясында өндірістік және инфрақұрылымдық бөлімшелерді қажетті мамандармен қамтамасыз ету мақсатында кадрларды іріктеу жұмыстары жүргізілуде. Кезекті бірыңғай комиссия отырысының қорытындысы бойынша бірқатар үміткер Шығыс Жезқазған кенішіне жұмысқа қабылдауға ұсынылса, бірнеше маман компанияның кадр резервіне енгізілді. Бұл туралы Qandastar.kz хабарлады.
Шығыс Жезқазған кенішіне жұмысшыларды іріктеу кезінде бірнеше лауазым бойынша үміткерлер қаралды. Өздігінен жүретін жерасты машиналарының машинисі қызметіне бір кандидат ұсынылды. Ал теспе бұрғылаушының көмекшісі лауазымына қатысқан алты үміткердің екеуі жұмысқа қабылдауға ұсынылып, тағы біреуі кадр резервіне енгізілді.
Сонымен қатар аймақтық бірыңғай қойма шаруашылығына мамандарды іріктеу жүргізілді. Жүк тиеуші лауазымына 28 адам өтініш берген. Бағалау нәтижесінде олардың төртеуі кадр резервіне алынды. Қажеттілік туындаған жағдайда бұл үміткерлер тиісті бос жұмыс орындарына орналасу үшін қарастырылады.
Компанияда мамандарды іріктеу бірыңғай комиссия арқылы жүзеге асырылады. Бұл тәсіл «Қазақмыстың» әртүрлі бөлімшелеріндегі үміткерлерге ортақ талаптар қоюға мүмкіндік береді. Бағалау барысында кандидаттардың кәсіби білімі мен даярлығы, еңбек тәжірибесі, лауазым талаптарына сәйкестігі және өндірістік қауіпсіздік талаптарын сақтау деңгейі ескеріледі.
Кадр резервін қалыптастыру компанияға қажетті мамандарды алдын ала анықтап, бос жұмыс орындарын қысқа мерзімде толықтыруға мүмкіндік береді. Ал резервке енгізілген үміткерлер үшін бұл жүйе болашақта өз біліктілігіне сәйкес бос орын ашылған кезде кандидат ретінде қаралуға мүмкіндік береді.
Компанияның мәліметінше, персоналды іріктеудің бірыңғай жүйесі кадрлық процестердің ашықтығын арттырып, кәсіпорындарды қажетті мамандармен уақытылы қамтамасыз етуге бағытталған.