Қауіпсіздік жылы аясында «Қазақмыс» корпорациясы мердігер ұйымдардың қызметкерлерін өндірістік қауіпсіздік пен тәуекелдерді басқарудың бірыңғай стандарттары бойынша оқытуды жалғастыруда. Бұл туралы Qandastar.kz сайты хабарлады.
Бағдарламаның кезекті кезеңінде «Tranco Balkhash» көлік-логистикалық компаниясының қызметкерлері «Qauipsizdik Start» (QStart) курсы бойынша білім алды. Оқыту «Қазақмыс» корпорациясының Кадрларды даярлау және қайта даярлау орталығында ұйымдастырылды.
Корпорация мәліметінше, өндірістік қауіпсіздік талаптары өндірістік нысандарда жұмыс істейтін барлық қызметкерлерге, олардың компания немесе мердігер ұйым өкілі екеніне қарамастан, бірдей қолданылады.
Сегіз сағатқа созылатын тәжірибелік семинар барысында қатысушылар тәуекелдерді анықтау және бағалау тәсілдерін, көлік пен арнайы техниканы қауіпсіз пайдалану ережелерін, жеке қорғаныс құралдарын қолдану тәртібін және төтенше жағдайлардағы іс-қимыл алгоритмдерін меңгереді. Сонымен қатар Life Saving Rules қағидалары мен қызметкердің өмірі мен денсаулығына қауіп төнген жағдайда жұмысты тоқтату құқығына ерекше назар аударылады.
Оқу соңында тыңдаушылар міндетті тестілеуден өтіп, электронды сертификат алады.
Айта кетейік, «Qauipsizdik Start» жобасы 2026 жылдың сәуір айында Балқаш қаласында басталып, кейін Сәтбаевтағы кәсіпорындарда енгізілген. Жыл соңына дейін «Қазақмыс» нысандарында жұмыс істейтін өндірістік бөлімшелер мен мердігер ұйымдардың 10 мыңнан астам қызметкері бірыңғай қауіпсіздік стандарттары бойынша оқытудан өтеді.
Толығырақ:
.