Оңтүстік Жезқазған кенішіндегі жағдайға байланысты «Қазақмыс» компаниялар тобының басшылығы еңбек ұжымының өкілдерімен кездесу өткізді. Бұл туралы Qandastar.kz сайты хабарлады.
Кеніш қызметкерлері кәсіпорынның материалдық-техникалық жабдықталуы мен еңбек жағдайларына қатысты бірқатар мәселені көтерген. Осыған байланысты компания басшылығы жұмысшылармен ашық форматтағы жұмыс кездесуін ұйымдастырды.
Кездесу барысында тараптар қызметкерлерді алаңдатқан мәселелерді талқылап, айтылған ұсыныстар мен бастамалардың барлығы белгіленген тәртіппен қарастырылатынын мәлімдеді.
Көтерілген мәселелердің басым бөлігі өткен жылдары қаржыландырудың жеткіліксіз болуына байланысты өндірістік жабдықтардың техникалық жағдайына қатысты болды. Осыған байланысты компания басшылығы өндірістегі қауіпсіздік пен сенімділікті арттыру, сондай-ақ жұмысшылардың еңбек жағдайларын жақсарту мақсатында инвестициялық бағдарламаны кеңейтіп, оны іске асыру қарқынын жеделдетуді жоспарлап отыр.
Компания еңбек ұжымының өкілдерімен қолданыстағы корпоративтік тетіктер мен әлеуметтік әріптестік қағидаттары аясында өзара іс-қимылды жалғастыратынын атап өтті.
Қазіргі уақытта кәсіпорын штаттық режимде жұмыс істеп тұр. Өндірістік үдерістер бекітілген жоспарларға сәйкес жүзеге асырылуда.
«Қазақмыс» компаниялар тобы қызметкерлермен ашық диалог қағидатын ұстанатынын және еңбек ұжымдарымен өзара байланыс орнатуды кәсіпорынды дамыту, еңбек қауіпсіздігін арттыру және әлеуметтік жағдайларды жақсартудың маңызды бағыты ретінде қарастыратынын мәлімдеді.
Толығырақ:
.