«Қазақмыс корпорациясы» ЖШС Басқарма төрағасы Руслан Өскенәлі Сәтбаев қаласының әкімі Мұрат Бөрібаевпен бірге Ұлытау облысын дамыту бағдарламасы аясында жүзеге асырылып жатқан әлеуметтік жобалардың орындалу барысын тексерді. Бұл туралы Qandastar.kz сайты хабарлады.
Жұмыс сапары барысында тараптар қала тұрғындары мен «Қазақмыс» кәсіпорындары қызметкерлері үшін маңызды нысандарды аралап, құрылыс жұмыстарының сапасы, мерзімінде аяқталуы және нысандарды пайдалануға беру мәселелерін талқылады.
Қазақмыс
Ірі жобалардың бірі – кеншілер қаласының басты қоғамдық орындарының бірі саналатын Кенші даңқы алаңын жаңғырту. Жоба аясында алаң толық абаттандырылып, балалар ойын алаңы, воркаут аймағы, жаяу жүргіншілер жолдары, субұрқақ, шағын сәулет нысандары және жасыл желектер бой көтереді. Жаңартылған кеңістікті 2026 жылдың үшінші тоқсанында пайдалануға беру жоспарланып отыр.
Қазақмыс
Сонымен қатар делегация қалалық аурухананы қайта жаңғырту және заманауи травматологиялық пункттің құрылысымен танысты. Бұл жоба тұрғындарға көрсетілетін медициналық көмектің қолжетімділігі мен сапасын арттыруға бағытталған. Құрылыс жұмыстары белгіленген кестеге сәйкес жалғасып, нысанды 2026 жылдың соңына дейін пайдалануға беру көзделген.
Қазақмыс
Сапар қорытындысында Руслан Өскенәлі мен Мұрат Бөрібаев аталған әлеуметтік жобалардың жүзеге асырылуы корпорация мен қала әкімдігінің тұрақты бақылауында екенін атап өтті.