2027 жылы Қазақстанның әлеуметтік саласы мен экономиканың нақты секторына жалпы 14,4 трлн теңгеден астам қаржы бағыттау жоспарланып отыр, деп хабарлайды qandastar.kz порталы.
Бұл қаражат әлеуметтік міндеттемелерді орындауға және елдің инфрақұрылымын дамытуға жұмсалады.
Бұл туралы Үкімет отырысында Қаржы министрі Мәди Такиев мәлімдеді.
Республикалық бюджет жобасында әлеуметтік салаға 10,5 трлн теңге қарастырылған. Бұл бюджет шығыстарының жалпы көлемінің 34,9 пайызына тең.
Халықты әлеуметтік қолдауға байланысты төлемдерді индекстеу және алушылар санының өзгеруі ескеріліп, осы бағытқа қосымша 739 млрд теңге бөлінбек.
Ал экономиканың нақты секторын қолдауға 3,8 трлн теңге қарастырылған. Бұл биылғы көрсеткіштен 507 млрд теңгеге көп және жалпы бюджет шығыстарының 12,9 пайызын құрайды.
Министрдің айтуынша, қаржының өсуі ең алдымен ел экономикасы үшін маңызды инфрақұрылымдық жобаларды жалғастыруға байланысты.
Жергілікті атқарушы органдардың даму бюджетін қоса есептегенде, нақты секторды қолдауға бағытталатын жалпы шығыс көлемі шамамен 7 трлн теңгеге жетеді.
Осылайша, 2027 жылғы бюджет жобасында халықты әлеуметтік қолдау мен экономиканың инфрақұрылымдық әлеуетін арттыру негізгі басымдықтардың бірі ретінде қарастырылған.