«Қазгидромет» 2026 жылғы 10 тамызға Қазақстан бойынша ауа райы болжамын жариялады, дейді Qandastar.kz.
Синоптиктердің мәліметінше, дүйсенбі күні еліміздің басым бөлігінде жаңбыр жауып, найзағай ойнайды. Қазақстанның оңтүстік-шығысындағы таулы аймақтарда нөсер күтіледі. Кей жерлерде бұршақ жаууы мүмкін. Сонымен қатар республика аумағында жел күшейіп, солтүстік өңірлерде күндіз шаңды дауыл болуы ықтимал. Солтүстік және солтүстік-шығыс облыстарда түнде және таңертең тұман түседі.
Елдің бірқатар өңірінде аптап ыстық сақталады. Атырау облысында, Ақтөбе облысының батысы мен оңтүстігінде, Ұлытау облысында және Қостанай облысының оңтүстігінде ауа температурасы +40...+41°C-қа дейін көтерілмек. Маңғыстау облысында +43...+44°C ыстық болжанады.
Алматы облысы, Жетісу, Батыс Қазақстан, Ақтөбе, Қостанай, Ақмола, Солтүстік Қазақстан, Ұлытау, Қарағанды облыстарында және Абай мен Шығыс Қазақстан облыстарының жекелеген аудандарында күндіз +35...+38°C болады. Жамбыл облысында ауа температурасы +38...+40°C, ал Түркістан және Қызылорда облыстарында +40...+43°C-қа дейін жетеді.
Сондай-ақ синоптиктер еліміздің бірқатар өңірінде өрт қаупінің жоғары және төтенше деңгейі сақталатынын ескертті. Әсіресе оңтүстік, батыс және орталық облыстарда өрт қауіпсіздігіне ерекше назар аудару қажет.