Қазақстан Үкіметі 2026–2030 жылдарға арналған медициналық көмектің сапасын басқару жүйесін жетілдіру жөніндегі кешенді жоспарды бекітті. Бұл туралы Zakon.kz мәліметіне сілтеме жасаған Qandastar.kz сайты хабарды жариялады.
Құжат денсаулық сақтау саласында медициналық қызмет сапасын бақылау мен басқарудың жаңа моделіне көшуді көздейді. Бұл модель деректерге, цифрлық технологияларға және жасанды интеллект құралдарына негізделеді.
Жоспарда медициналық қызмет көрсету сапасын арттыру, басқару жүйесінің ашықтығын қамтамасыз ету және медициналық көмектің қауіпсіздігін тұрақты түрде жақсартуға бағытталған кезең-кезеңімен жүзеге асырылатын шаралар қарастырылған. Негізгі мақсат – пациенттің медициналық қызмет сапасын бағалау және бақылау процесіне белсенді қатысуын қамтамасыз ететін жүйе қалыптастыру.
Кешенді жоспар аясында жүйені дамытудың төрт негізгі бағыты белгіленген. Олар: медициналық қызмет көрсету саласындағы реттеу құралдарын жаңарту, жасанды интеллектті пайдалана отырып сапа сараптамасының жаңа моделін енгізу және Ұлттық сапа институтын құру, медициналық қауымдастық пен пациенттердің рөлін күшейту, сондай-ақ сапаны басқару жүйесін толық цифрландыру.
Үкіметтің мәліметінше, бұл жоспар медициналық көмектің сапасын бақылаудың бірыңғай жүйесін қалыптастыруға, медициналық ұйымдардың жұмысын ашық етуге және басқару шешімдерін нақты деректер негізінде қабылдауға мүмкіндік береді.
2030 жылға дейін медициналық қызметтердің негізгі сапа көрсеткіштерін жақсарту көзделген. Осы мақсатта профилактикалық бақылау жүйесі енгізіліп, сарапшыларға арналған автоматтандырылған жұмыс орындары құрылады және лицензиядан кейінгі бақылау процестері цифрландырылатын болады.
Сонымен қатар 2028 жылдан бастап ТМККК және МӘМС қызметін көрсететін ұйымдар үшін міндетті аккредитация талаптарын енгізу жоспарланып отыр. Аккредитациядан кейінгі мониторинг те цифрлық форматта жүргізіледі. Нәтижесінде медициналық ұйымдардың кемінде 70 пайызы лицензиядан кейінгі мониторингпен қамтылып, олардың 80 пайызы жаңа стандарттар бойынша аккредиттеледі деп жоспарланған.
Бұдан бөлек, Ұлттық ғылыми денсаулық сақтауды дамыту орталығының базасында Ұлттық сапа институтын құру көзделген. Бұл институт әдістемелік және талдамалық орталық ретінде жұмыс істейді. Оның қызметі Дүниежүзілік денсаулық сақтау ұйымының техникалық қолдауымен жүзеге асырылады.
Жоспар аясында медициналық қауымдастық пен пациенттердің рөлін күшейту де қарастырылған. Кәсіби бірлестіктер сапаға тәуелсіз сараптама жүргізуге қатысып, мамандардың клиникалық ойлау қабілетін бағалауға тартылмақ. Сонымен қатар пациенттерді қолдау қызметтері цифрландырылып, азаматтардың өтініштеріне жедел жауап беру мүмкіндігі кеңейтіледі.
Сондай-ақ 2028 жылға дейін медициналық көмек көрсету стандарттары толық цифрлық форматқа көшіріледі. Ал 2027 жылдан бастап медициналық қызмет сапасын бағалаудың үш компонентті моделі енгізіледі. 2028 жылға қарай медициналық көмектің сапасы мен көлеміне жүргізілетін мониторингтің кемінде 20 пайызы жасанды интеллект технологиялары арқылы жүзеге асырылатын болады.
Үкіметтің қорытындысына сәйкес, бұл жоспар денсаулық сақтау жүйесіндегі қатысушылардың өзара іс-қимылын үйлестіруге, басқару тиімділігін арттыруға және медициналық қызмет сапасын жақсартуға мүмкіндік береді.