Қазақстанда 1 қыркүйектен бастап жүрілген көліктердің бағасы төмендеуі мүмкін. Мұндай болжамды кәсіпкер Нұрлан Жанай айтты, деп хабарлады Qandastar.kz сайты.
Кәсіпкердің айтуынша, 2026 жылдың күзінен бастап Қазақстанның екінші нарығында әсіресе электромобильдер мен гибридтердің бағасы айтарлықтай арзандауы ықтимал. Оның пікірінше, бұл өзгеріс жаңа көліктерге емес, пайдаланылған автокөліктерге қатысты болады.
Нұрлан Жанайдың сөзінше, жаңа автокөліктер сатылатын бастапқы нарықтағы бәсекелестік сақталады. Сондықтан жаңа көліктердің бағасы күрт төмендейді деп күтуге негіз жоқ. Оның орнына дилерлер тұтынушыларды тиімді несие бағдарламалары, бөліп төлеу мүмкіндігі және түрлі акциялар арқылы тартуға тырысуы мүмкін.
Сарапшы сондай-ақ жаңа электромобильдер мен гибридтерге сұраныстың жоғары болуы уақыт өте келе екінші нарықта мұндай көліктердің көбейіп кетуіне алып келетінін айтты. Оның пікірінше, көптеген азамат көлікті несиеге сатып алып, белгілі бір уақыт пайдаланғаннан кейін сатуға шығарады.
«Адамдар жаңа көлік алып, біраз уақыт мінеді. Кейін қажетті эмоциясын алған соң немесе қаржылық қажеттілік туындағанда көлігін сатуға тырысады. Сол кезде сатып алушы табу үшін бағаны төмендетуге мәжбүр болады», – дейді Нұрлан Жанай.
Оның болжамынша, кейбір электромобильлер мен гибридтердің бағасы 5–6 млн теңгеге дейін төмендеуі мүмкін. Ал жекелеген жағдайларда құнның төмендеуі 10–12 млн теңгеге жетіп, көлік бағасы шамамен 50 пайызға арзандауы ықтимал.
Сарапшының пікірінше, егер бұл болжам жүзеге асса, күз айлары екінші нарықтан көлік сатып алуды жоспарлаған азаматтар үшін қолайлы кезең болуы мүмкін.
Бұған дейін Премьер-министр Олжас Бектенов жанар-жағармай нарығындағы ахуалға қатысты арнайы жиын өткізгені хабарланған.