Қазақстанда мемлекеттік қызметшілердің белгілі бір санаттары енді есірткі мен психотроптық заттарды қолдануға қатысты міндетті медициналық тексеруден өтуі мүмкін. Бұл талап мемлекеттік қызметке қатысты жаңа заңнамалық өзгерістер аясында қарастырылып отыр, деп хабарлайды Qandastar.kz сайты Tengrinews.kz порталына сілтеме жасап.
Жаңа түзетулерге сәйкес, «Халық денсаулығы және денсаулық сақтау жүйесі туралы» кодекске 142-1-бап енгізіледі. Ол есірткі құралдары мен психотроптық заттарды заңсыз қолданудың алдын алу мақсатында мемлекеттік қызметшілерге міндетті наркологиялық тексеру жүргізуді көздейді. Сонымен қатар, бұл тексерулердің нақты тәртібі мен ережелерін уәкілетті орган бекітетін болады.
Сенат отырысында депутат Андрей Лукин бұл талап кімдерге нақты қолданылатынын және қандай критерийлер негізінде анықталатынын нақтылауды сұрады. Оның айтуынша, мұндай шараның тиімділігі мен қызметкерлердің кәсіби жарамдылығына әсері маңызды мәселе.
Мемлекеттік қызмет істері агенттігі төрағасының орынбасары Салауат Мүксімовтің айтуынша, заңда жыл сайын міндетті тексеруден өтетін санаттар белгіленген. Олардың қатарында басшылық қызмет атқаратын, яғни қарамағында қызметкерлері бар тұлғалар бар. Бұдан бөлек, кейбір жағдайларда қызметтің ерекшелігіне қарай тексеруді мемлекеттік орган басшысы да қосымша белгілей алады, мысалы, мемлекеттік құпиялармен жұмыс істейтіндер үшін.
Оның сөзінше, бұл талап мемлекеттік қызметтің ашықтығын арттыруға, қоғам сенімін күшейтуге және теріс әрекеттердің алдын алуға бағытталған.
Сенат депутаттары заң жобасын және оған қатысты түзетулерді екі оқылымда мақұлдады. Бұған дейін бұл құжат Мәжілісте де қабылданған.
Сонымен қатар жаңа нормаларға сәйкес, мемлекеттік қызметкер есірткі қолданғаны немесе мас күйінде көлік басқарғаны анықталса, ол жұмыстан босатылуы мүмкін. Мұндай әрекеттер мемлекеттік қызмет беделіне нұқсан келтіретін ауыр тәртіптік бұзушылық ретінде қарастырылады және қызметкер кез келген уақытта тәртіптік іс қарауға шақырылуы мүмкін.