24 қыркүйекте Каспий теңізіндегі әскери оқу-жаттығу кезінде қайғылы оқиға болды. Мемлекет басшысы Қасым-Жомарт Тоқаев қаза тапқан әскери қызметшілердің туған-туыстары мен жақындарына көңіл айтып, 25 қыркүйекті Жалпыұлттық аза тұту күні деп жариялады.
Осыған байланысты Қостанай мен Саран қалаларындағы машина жасау кәсіпорындары, сондай-ақ Allur, QazTehna және Agromash зауыттары қаза тапқан әскери қызметшілердің отбасыларына қаржылай қолдау көрсететінін мәлімдеді.
Қазақстан Халық Кеңесінің мүшесі Андрей Лаврентьев әрбір қаза тапқан әскери қызметшінің отбасына 25 млн теңгеден қаржылай көмек көрсетеді.
«Президентіміз Қасым-Жомарт Кемелұлы Тоқаев аза тұту күнін жариялады. Қазақ халқының дәстүрінде қиын-қыстау кезеңде бір-біріне қолдау көрсету ерекше орын алады. Сондықтан әріптестерімізбен бірге қаза тапқан әскери қызметшілердің әрбір отбасына көмектесуді өз міндетіміз деп санаймыз», – деді Андрей Лаврентьев.
Кәсіпорындар ұжымдары қаза болған әскери қызметшілердің жақындарына қайғырып көңіл айтып, отбасыларына қолдау білдіретінін жеткізді.