Құрылтай депутаттары Маңғыстау облысындағы әскери оқу-жаттығу кезінде қаза тапқан және зардап шеккен әскери қызметшілердің отбасыларына көмек көрсету үшін 146 млн 650 мың теңге жинады. Бұл туралы Qandastar.kz сайты хабарлады.
Құрылтай Бюросының отырысы қаза тапқан әскери қызметшілерді бір минут үнсіздікпен еске алудан басталды. Құрылтай Төрағасы Айбек Дәдебай марқұмдардың отбасылары мен жақындарына көңіл айтты.
«Маңғыстау облысында қызметтік міндеттерін атқару кезінде әскери қызметшілердің қаза болуы – бүкіл халқымыз үшін үлкен қайғы. Барлық депутаттардың атынан қаза тапқан азаматтардың отбасыларына көңіл айтамын. Бұл бәріміз үшін орны толмас қасірет», – деді Айбек Дәдебай.
Отырыста қаза тапқан және зардап шеккен әскери қызметшілердің отбасыларына қолдау көрсету үшін ерікті түрде қаражат жинау туралы шешім қабылданды. Қазіргі уақытта депутаттардың жеке қаражаты есебінен 146 млн 650 мың теңге жиналған. Қаражат «Ұлттық рух» қорына аударылады.
Қаражат жинау жалғасып жатыр. Атап айтқанда, Айдарбек Қожаназаров, Руслан Идрисов, Мейірхат Қасымбаев, Бекжан Айтқұлов және Махамбет Хасенов әрқайсысы 20 млн теңгеден бөлді. Дана Медеуова, Айжан Наимбекова және Бауыржан Жамалов әрқайсысы 10 млн теңгеден аударды.
Сондай-ақ Тұрарбек Тілемісов, Мұратбек Мұхамбедиев және Мұса Хайруллиев 5 млн теңгеден, ал Бегалы Ералиев 500 мың теңге көлемінде қаражат бөлді. Қалған депутаттар да көмек көрсетуге атсалысты.