Мексика әлем чемпионатын жеңіспен бастады, деп хабарлайды qandastar.kz порталы.
2026 жылғы футболдан әлем чемпионатының алғашқы ойыны жанкүйерлерге бірден эмоция сыйлады.
Мексика өз алаңында өткен турнирдің ашылу матчында Оңтүстік Африка құрамасын 2:0 есебімен жеңді.
Мехикодағы аты аңызға айналған Estadio Azteca стадионында өткен кездесуде алаң иелері алғашқы минуттардан-ақ шабуылға шықты. Есепті 9-минутта Джулиан Киньонес ашып, әлем чемпионатының алғашқы гол авторы атанды.
Екінші таймда Мексика басымдығын тағы бір рет дәлелдеді. Рауль Хименес қарсыластар қақпасынан саңылау тауып, есепті 2:0-ге жеткізді.
Матч тек голдармен емес, тәртіпке байланысты оқиғалармен де есте қалды. Кездесу барысында үш футболшы алаңнан қуылды: Оңтүстік Африка құрамасының екі ойыншысы және Мексика сапынан бір ойыншы қызыл қағаз алды.
Осылайша, турнир иесі Мексика әлем чемпионатындағы жорығын сәтті бастап, жанкүйерлеріне алғашқы жеңісін сыйлады.
2026 жылғы әлем чемпионаты 11 маусым мен 19 шілде аралығында АҚШ, Канада және Мексика аумағында өтеді.