Қазақстан Республикасының Премьер-министрі Олжас Бектенов жалпыхалықтық референдум нәтижелері бойынша қазақстандықтарды жаңа Конституцияның қабылдануымен құттықтады, деп хабарлайды QANDASTAR ақпараттық агенттігі.
Үкімет басшысы өз үндеуінде Президент Қасым-Жомарт Тоқаевтың басшылығымен елдің дамудың жаңа кезеңіне қадам басқанын атап өтті. Оның айтуынша, өткен жалпыхалықтық референдумда қазақстандықтар бірлік пен отаншылдықтың үлгісін көрсетіп, Мемлекет басшысының саяси және әлеуметтік-экономикалық реформаларын қолдаған.
Премьер-министр бұл оқиғаның ел тарихындағы маңызды кезең екенін айтып, қазақстандықтар жаңару мен жаңғыру жолына дауыс беру арқылы мемлекеттілікті нығайтуға өз үлестерін қосқанын жеткізді.
Сондай-ақ Олжас Бектенов жаңа Конституция әділетті әрі өркендеген Қазақстанды қалыптастыруға бағытталғанын атап өтті. Оның пікірінше, ұлттық дәстүрлер мен мәдениетке құрмет сақтала отырып, елдің дамуы демократиялық құндылықтар негізінде жалғасады.
Үкімет басшысы жүргізіліп жатқан реформалардың сапасы мен қарқынын қамтамасыз ете отырып, қойылған мақсаттарға бірге қол жеткізуге сенім білдірді. Сонымен қатар ол қазақстандықтарды жаңа Конституцияның қабылдануымен құттықтады.