«Қазақмыс» Балқаш мыс балқыту зауытында энергия үнемдеу технологияларын енгізіп, мазут шығынын қысқартты. №3 анод пешіне арналған жану үдерісін басқарудың автоматтандырылған жүйесін енгізу нәтижесінде отын тұтыну 15%-ға төмендеді. Бұл туралы Qandastar.kz сайты хабарлады.
Жоба аясында пешке автоматтандырылған басқару және қорғау жүйесімен жабдықталған екі заманауи мазут оттығы орнатылды. Инвестиция көлемі 60,26 млн теңгені құрады.
Бұған дейін пештегі отын мен ауа беру үдерісі қолмен реттелетін. Мұндай тәсіл жанудың тұрақты режимін қамтамасыз етуді қиындатып, түтіннің пайда болуына және күйенің жиналуына әкелетін.
Жаңа автоматтандырылған жүйе мазут пен ауа беруді өздігінен реттеп, отын шығынын бақылауға мүмкіндік береді. Технологиялық параметрлер белгіленген шектен ауытқыған жағдайда жүйе отын беруді автоматты түрде тоқтатады. Бұл пештің тұрақты жылу режимін сақтап, отынның жану тиімділігін арттыруға және қолмен орындалатын операцияларды азайтуға жағдай жасайды.
Сонымен қатар әр агрегат бойынша мазут шығынын жеке есепке алу жүйесі енгізілді. Оның көмегімен отын тұтынуды дәлірек бақылауға, артық шығынның себептерін анықтауға және анодты мыс өндірудің технологиялық талаптарын сақтауға болады.
№3 анод пеші жаңа технология енгізілген алғашқы нысан болды. Алынған нәтижелер расталған жағдайда осындай жүйелерді №1 және №2 анод пештеріне де орнату жоспарланып отыр.
Бұдан бөлек, компания кептіру пештеріндегі, Ванюков пештеріндегі және конвертерлердегі жану жүйелерін жаңғырту мүмкіндігін қарастыруда.
Жоба Балқаш мыс балқыту зауытын жаңғырту бағдарламасы аясында жүзеге асырылуда. Бағдарлама өндіріс тиімділігін арттыруға, жабдықтардың техникалық сенімділігін қамтамасыз етуге және ресурстарды ұтымды пайдалануға бағытталған.
Автоматтандырылған жүйені енгізу металлургиялық өндірістегі технологиялық үдерістерді жетілдіріп, отын шығынын азайтуға мүмкіндік береді.