Қазақстан Президенті Қасым-Жомарт Тоқаев Республика күні қарсаңында елдің дамуына елеулі үлес қосқан бір топ азаматты мемлекеттік наградалармен марапаттау туралы Жарлыққа қол қойды. Бұл туралы Qandastar.kz сайты хабарлады.
Мемлекеттік наградалар әлеуметтік-экономикалық және мәдени-рухани дамуға, халықтар арасындағы достық пен ынтымақтастықты нығайтуға үлес қосқан азаматтарға берілді. Марапатталғандардың қатарында еңбек ардагерлері, өндіріс мамандары, кәсіпкерлер, ғалымдар, ұстаздар, дәрігерлер, әскери қызметшілер, құқық қорғау органдарының өкілдері, спортшылар мен өнер қайраткерлері бар.
«Қазақстанның Еңбек Ері» атағы «Kazakhmys Smelting» ЖШС Жезқазған мыс балқыту зауытының балқытушысы Ә. Доспановқа өндірістегі еңбегі үшін берілді.
«Отан» орденімен композитор, көрнекті мәдениет және өнер қайраткері, «Музарт» тобының танымал болуына үлес қосқан А. Қоразбаев марапатталды.
«Барыс» орденінің І дәрежесі «TNS-group» концерні» заңды тұлғалар бірлестігінің президенті Т. Жұмағұлов пен актер Н. Ықтымбаевқа табысталды. ІІ дәрежелі орденмен білім саласының ардагері Е. Мәмбетқазиев және альпинизм федерациясының вице-президенті Қ. Уәлиев марапатталды. Ал ІІІ дәрежелі орден «Ново-Приречное» ЖШС директоры В. Тюркинге, «Ардагерлер ұйымы» республикалық қоғамдық бірлестігінің Ақтөбе облыстық филиалының төрағасы С. Шаңғұтовқа және басқа да азаматтарға берілді.
«Парасат» орденіне ғылым, мәдениет және өндіріс салаларында еңбек еткен бірқатар азамат ие болды. Олардың қатарында «Ақмая» шаруа қожалығының төрағасы Д. Жұмбеков, А. Байтұрсынұлы атындағы Тіл білімі институтының бас ғылыми қызметкері Н. Уәли, археолог А. Подушкин, Қарағанды медициналық университетінің профессоры М. Түсіпбекова және «Радуга» ЖШС бас директоры Д. Шарапаев бар.
«Құрмет» орденімен мұнай-газ, медицина, ауыл шаруашылығы және әлеуметтік қолдау салаларының өкілдері марапатталды. Олардың қатарында «Өзенмұнайгаз» АҚ кран машинисі Б. Досқарин, дәрігер Е. Кальмбах, агроном Т. Хамидуллин, «Здоровая Азия» қорының негізін қалаушы Н. Плохих, «Қамқорлық» оңалту орталығының басшысы А. Мұсафирова және басқа да азаматтар бар.
Сонымен қатар қоғамдық келісім мен ұлтаралық татулықты нығайтуға үлес қосқан азаматтарға «Ел бірлігі» ордені берілді. Марапат иелерінің қатарында Алматы қаласындағы Түрікмен қоғамдық-мәдени орталығының құрметті төрағасы Г. Аннакулиева, «Вайнах» этномәдени бірлестігінің төрағасы У. Джанаев, Қазақстандық немістердің «Возрождение» бірлестігінің атқарушы директоры Д. Редлер және «Tamos Space School» мұғалімі Д. Ромащенко бар.
Мемлекеттік наградалар азаматтардың елдің дамуына, қоғамның бірлігіне және түрлі салалардың өркендеуіне қосқан еңбегін бағалау мақсатында табысталды.