Голливуд актері Сильвестр Сталлоне үлкен қызы Софияның алдағы үйлену тойына қаражат қажет болғандықтан, әзірге зейнетке шығуды жоспарламайтынын айтты. Бұл туралы People басылымына сілтеме жасаған Qandastar.kz хабарлады.
Актер бұл туралы Live with Kelly and Mark таңғы телешоуының эфирінде әңгімеледі. Жүргізуші Келли Рипа алдағы тойдың шығыны туралы сұрағанда, Сталлоне жұмысын жалғастыруға тура келетінін жеткізді. Ол мұны әзіл ретінде айтпағанын да атап өтті.
Актердің 28 жастағы қызы София Сталлоне тамыз айында сүйіктісі Майкл Шиханмен некелесуге келісім берген. Сталлоненің айтуынша, болашақ күйеу баласы одан қызына үйленуге алдын ала рұқсат сұраған және оның көңілінен шыққан.
Сильвестр Сталлоне жұбайы Дженнифер Флавинмен бірге София, Систин және Скарлет есімді үш қыз тәрбиелеп отыр. Актер отбасылық мерекелерді ұйымдастыру кезінде жұбайына қолдау көрсетіп, кейде бітімгер рөлін атқаратынын айтты.
Голливуд жұлдызы үлкен қызымен қарым-қатынасының ерекше жылы екенін және оның бақыты үшін қолдан келгеннің бәрін жасауға дайын екенін жеткізді.