Солтүстік Қазақстан облысында агроөнеркәсіп саласын дамытуға бағытталған ірі инвестициялық жоба жүзеге асуда. Бұл туралы Qandastar.kz сайты Stan.kz порталына сілтеп хабарлады. Bank RBK қолдауымен Новоишим ұн комбинаты дәстүрлі өндірістен заманауи, экспортқа бағытталған агроөнеркәсіптік кешенге айналуда.
Кәсіпорын 2010 жылы құрылып, уақыт өте өндірістік қуатын арттырды. Ал негізгі серпін 2024 жылы сағатына 100 тонна өнім шығаратын жоғары технологиялық жем зауыты іске қосылғаннан кейін байқалды.
Жобаны қаржыландыру арқылы банк өндірісті жаңғыртуға, қуатты ұлғайтуға және логистикалық жүйені дамытуға мүмкіндік берді. Құрылыс бір жылдан астам уақытқа созылып, зауыт алғашқы өнімін 2025 жылдың маусымында шығарды.
Қазіргі таңда кәсіпорын жобалық қуаттың шамамен 40%-ына жетті. 2026 жылы бұл көрсеткішті 70%-ға дейін жеткізу, ал 2027 жылы толық қуатқа шығу жоспарланып отыр.
Өнім түрлері де кеңейіп келеді. 2026 жылдан бастап компания мал мен құсқа арналған түрлі құрама жем өндіруді бастады. Жемдік ұн Қытайға экспортталуда, ал алдағы уақытта өнімді Өзбекстан, Қырғызстан және Тәжікстан нарықтарына шығару көзделген.
Жоба өңірдің әлеуметтік дамуына да әсер етті: жаңа зауытта 40 жұмыс орны ашылып, қызметкерлер заманауи жабдықтармен жұмыс істеуге оқытылды. Сонымен қатар ауыл инфрақұрылымы жақсарып, өмір сүру сапасы артып келеді.
Компания өкілдерінің айтуынша, банкпен серіктестік өндірісті кеңейтуге, кадрлық әлеуетті нығайтуға және экспорт географиясын ұлғайтуға мүмкіндік берген.
Бүгінде кәсіпорын тек ұн өңдеуші зауыт емес, заманауи технологияларға негізделген және экспортқа бағытталған агроөнеркәсіптік орталыққа айналып отыр.