Қазақстанда такси бағасының күрт өсуіне байланысты inDrive сервисіне ескерту жасалды, деп хабарлайды Qandastar.kz.
11 қазанда «Яндекс Go» жұмысын тоқтатқан кезде, жолаушылардың басым бөлігі балама қызмет ретінде inDrive-ке жүгінген. Соның салдарынан кейбір бағыттарда жол жүру құны үш есеге жуық өскен.
Бұл жағдайға Бәсекелестікті қорғау және дамыту агенттігі назар аударды. Ведомство сервиске жолаушылардың құқықтары мен бәсекелестік туралы заңнама талаптарын бұзуы мүмкін әрекеттерге жол бермеу жөнінде ескерту жолдады.
Баға неге қымбаттады?
Агенттік мәліметінше, inDrive платформасында жол жүру құнын жүргізуші мен жолаушы өзара келіседі. Алайда бос көліктер азайып, таксиге сұраныс артқан кезде жүргізушілер сапар үшін жоғары баға ұсына бастаған.
Осы жағдайдан кейін сервис комиссия мөлшерін төмендетіп, баға бойынша саудаласуды шектеу шараларын қабылдағанын хабарлады.
БҚДА жағдайды назарда ұстап отыр. Ал такси бағасының күрт өзгеруі сұраныс артқан кезде жолаушылардың жол жүру шығыны қаншалықты өсетінін тағы бір мәрте көрсетті.