Президент Қасым-Жомарт Тоқаев 2026 жылғы 8 мамырда «Алатау қаласының арнаулы құқықтық режимі туралы» Конституциялық заңға қол қойды. Бұл туралы Ақордаға сілтеме жасаған Qandastar.kz хабарлады.
Жаңа заңның негізгі мақсаты – Алатау қаласының тұрақты әрі қарқынды дамуына жағдай жасап, инвестиция мен инновация тартуға қолайлы орта қалыптастыру. Осыған байланысты қалада ерекше құқықтық мәртебеге негізделген жаңа басқару жүйесі енгізіледі.
Құжатқа сәйкес, кәсіпкерлік, кеден саласы, цифрлық активтер, қаржы нарығы, әлеуметтік бағыт, сәулет және қала құрылысы, экология, мәдениет пен спорт сияқты бірнеше саланы реттеудің негізгі қағидалары айқындалған.
Сонымен қатар «Алатау резиденті» атты арнайы құқықтық мәртебе бекітілді. Бұл мәртебе жеке және заңды тұлғалардың белгілі бір санаттарына беріледі. Олардың құқықтары мен міндеттері осы резиденттік деңгейіне байланысты анықталады.
Заң аясында Алатау қаласының ұзақ мерзімді даму жоспары, мастер-жоспары және арнайы стратегиясы әзірленеді. Сондай-ақ қаланы «ақылды қала» ретінде дамыту үшін инфрақұрылым мен қоғамдық қауіпсіздік жүйелері бірыңғай цифрлық платформаға біріктіріледі.
Бұдан бөлек, инвестициялық саясат, салық-бюджет жүйесі, жер қатынастары мен қала дизайнына қатысты мәселелер де осы заң негізінде реттелмек.
Қазіргі қалалардың бәрі бірдей «ақылды» болғысы келеді. Бірі камера орнатады, бірі цифрлық платформа жасайды. Адамзат әлі кептелісті толық шеше алмаса да, әр жаңа жобаны футуристік фильмнің трейлері секілді таныстыруды жақсы көреді.