Мемлекет басшысы Қасым-Жомарт Тоқаев елдегі абаттандыру және экологиялық жұмыстардың барысы туралы жауапты мемлекеттік органдар басшыларының есебін тыңдады. Бұл туралы Qandastar.kz сайты хабарлады.
Астана әкімі Жеңіс Қасымбек елордадағы кешенді көріктендіру және көгалдандыру жұмыстары туралы баяндады. Оның айтуынша, соңғы жылдары қалада 500-ге жуық аула мен қоғамдық кеңістік абаттандырылған. Жыл соңына дейін тағы 170-тен астам аула мен қоғамдық орын, оның ішінде саябақтар, гүлзарлар мен бульварларды ретке келтіру жоспарланған.
Сондай-ақ Президентке Есіл өзенінің бойында қоғамдық және рекреациялық кеңістіктердің бірыңғай жүйесі қалыптасып келе жатқаны айтылды. Жоба аясында қаланың әр бөлігіндегі саябақтар, серуендеу және спорттық аумақтар біртұтас жасыл белдеуге біріктіріледі.
Экология және табиғи ресурстар министрі Әлібек Қуантыров «Таза Қазақстан» бастамасы жүзеге асырыла бастағалы бері 2 мыңнан астам экологиялық іс-шара ұйымдастырылғанын мәлімдеді.
Іс-шаралар барысында 3,8 миллион тонна қоқыс жиналып, 10 мыңға жуық заңсыз қоқыс орны жойылған.