Түркістан облысында көлігі бұзылып, жолда қалған Өзбекстанның үш азаматына ТЖМ құтқарушылары көмек көрсетті. Олар шетелдіктерді жақын маңдағы жылыту пунктіне жеткізді, деп хабарлайды Qandastar.kz сайты.
Оқиға Келес ауданының Абай ауылында, «Сарыағаш – Абай» облыстық маңызы бар автожолында болған. Автокөліктің техникалық ақауына байланысты үш адам жолда қиын жағдайға тап болған.
Оқиға орнына жеткен ТЖМ-нің «Қызыл-Аскер» трассалық медициналық-құтқару пунктінің қызметкерлері оларға жедел көмек көрсетіп, жақын маңдағы жылыту пунктіне жеткізді.
Құтқарушылардың мәліметінше, азаматтар медициналық көмекке мұқтаж болмаған. Олар көрсетілген қолдау мен қамқорлық үшін құтқарушыларға алғыстарын білдірді.