Мәжіліс депутаты Асхат Аймағамбетов 2026 жылғы 20 мамырда Үкімет кулуарында ҰБТ-дан ең жоғары балл алған оқушыларға кейбір дайындық орталықтары тарапынан пәтер мен көлік секілді қымбат сыйлықтар беру тәжірибесіне қатысты пікір білдірді, деп Qandastar.kz сайты Zakon.kz порталына сілтеп хабарлайды.
Депутаттың айтуынша, соңғы уақытта ҰБТ-дан максималды нәтиже көрсететін түлектер санының көбеюі белгілі бір деңгейде сұрақ тудырады. Ол бұрын мұндай жоғары балл иелеріне міндетті түрде қосымша тексеріс жүргізілетінін, бұл тәжірибені жалғастыру маңызды екенін атап өтті. Аймағамбетов академиялық адалдықты сақтау қажет екенін айтып, бірақ оқушылардың жетістігіне күмән келтіру мақсат емес екенін де нақтылады. Оның пікірінше, бұл нәтиже – оқушының жеке еңбегі, ата-ананың қолдауы және мұғалімдердің жүйелі жұмысының жиынтығы.
Сонымен қатар ол дайындық орталықтары беретін бағалы сыйлықтарды негізінен маркетингтік құрал ретінде қарастыруға болатынын айтты. Дегенмен депутат мұндай жоғары нәтижені тек бір орталықтың еңбегі деп бағалау дұрыс емес екенін ескертіп, оның артында бүкіл білім беру жүйесінің үлесі бар екенін жеткізді.