Украинаның бірнеше қаласына жасалған Ресейдің дрон және зымыран шабуылдары салдарынан кемінде 20 адам қаза тауып, ондаған тұрғын жарақат алды. Ең ауыр соққы Днепр қаласындағы теміржол вокзалына тиіп, шабуыл кезінде кемінде 14 адам көз жұмған. Qandastar.kz сайты хабарлады.
Reuters агенттігінің мәліметінше, бейсенбі күні Днепр қаласындағы орталық теміржол вокзалында қала маңына қатынайтын пойыз жөнелтуге дайындалып жатқан кезде дрон шабуылы болған. Сол сәтте перронда көптеген жолаушы болған.
Сонымен қатар Днепрдегі студенттер жатақханасына да соққы жасалып, ғимараттан өрт шыққан. Өңір губернаторы Александр Ганжаның хабарлауынша, шабуыл салдарынан қаладағы 350 мыңға жуық үй электр қуатынсыз қалған.
Украинаның басқа қалаларында да адам шығыны тіркелді. Чернигов қаласында дрон шабуылынан екі жасөспірім қыз қаза тауып, 23 адам жараланған. Олардың арасында төрт бала бар. Ал Кременчуг қаласындағы тұрғын үйлерге жасалған соққылардан үш адам қаза тауып, 32 адам жарақат алған.
Кейінірек Киев қаласына да зымыранмен шабуыл жасалған. Қала әскери әкімшілігінің мәліметінше, бір адам қаза тауып, қоймалар өртенген. Зымыран қалдықтары Днепр өзенінің шығыс жағындағы ғимаратқа зақым келтірген.
Украина президенті Владимир Зеленский шабуылдарды қатал әрі әдейі жасалған әрекет деп бағалап, Ресейдің жаңа баллистикалық зымыран соққыларына дайындалып жатқаны туралы барлау мәліметтері бар екенін мәлімдеді.
Шабуылдар АҚШ қолдауымен Херсон облысының оңтүстігінде алты күндік жергілікті бітім жасалған кезеңде болған. Келісім аясында Ресей бақылауындағы Олешки қаласына гуманитарлық көмек жеткізуге мүмкіндік жасау көзделген. Тараптар миналарды залалсыздандыру жұмыстары аяқталғанын хабарлаған.
Сонымен қатар АҚШ қолдауымен соғысты тоқтатуға бағытталған бейбіт келіссөздерді қайта жандандыру жұмыстары жүріп жатыр. Келесі айда үшжақты келіссөздердің жаңа кезеңін өткізу жоспарланған.