Көлік министрлігі әуе кемелерінде «бомба», «жарылыс», «террорист», «қару», «басып алу» сияқты сөздерді әзіл ретінде де қолданбауға шақырды. Ведомство мұндай мәлімдемелер авиациялық қауіпсіздікке төнген қатер ретінде қабылданатынын ескертті. Бұл туралы Qandastar.kz сайты хабарлады.
Министрлік өкілдерінің айтуынша, күнделікті өмірде аталған сөздер жай әңгіме барысында немесе әзіл ретінде айтылуы мүмкін. Алайда ұшақ бортында олардың мағынасы басқаша бағаланады. Экипаж айтылған сөздің әзіл немесе нақты қауіп екенін бірден анықтай алмайтындықтан, кез келген ықтимал қатерге белгіленген тәртіп бойынша әрекет етуге міндетті.
Мұндай жағдайда әуе кемесі мен багаж тексеріліп, авиациялық қауіпсіздік қызметі мен полиция жұмылдырылуы мүмкін. Қажет болған жағдайда жолаушылар эвакуацияланып, әуежайдың жекелеген аймақтарына кіру шектеледі. Бұл рейстің кешігуіне және әуе компаниясы мен әуежайға қосымша шығын келуіне әкелуі ықтимал.
Министрлік Алматы – Ақтау бағытындағы рейсте болған жағдайды мысалға келтірді. Жолаушылардың бірі «бомба» деген сөз айтқаннан кейін авиациялық қауіпсіздік қызметкерлері мен көліктік полиция шақырылып, ер адам рейстен түсірілген. Соның салдарынан ұшақ екі сағатқа жуық кешігіп ұшқан.
Қазақстанның Қылмыстық кодексінің 273-бабына сәйкес терроризм актісін жасауға дайындалып жатқаны туралы көрінеу жалған хабар бергені үшін жауапкершілік қарастырылған. Оған айыппұл, түзеу жұмыстары немесе бас бостандығын шектеу жазасы тағайындалуы мүмкін.
Ведомство ұшақта және әуежайда бомба, жарылғыш зат, қару, терроризм немесе әуе кемесін басып алу туралы негізсіз мәлімдемелер жасауға, сондай-ақ жолаушылар мен экипажға зиян келтіру немесе багажда қауіпті заттардың болуы жөнінде әзілдеуге болмайтынын атап өтті.
«Әзіл ретінде» айтылған сөздің өзі авиациялық қауіпсіздік қызметтерінің әрекет етуіне себеп болуы мүмкін. Сондықтан жолаушыларды мұндай сөздер мен мәлімдемелерден аулақ болуға шақырды.