Жамбыл облысында жалған мемлекеттік нөмірмен жүрген Range Rover жүргізушісі полицияның тоқтау туралы талабына бағынбай, қашуға әрекет жасаған. Сот шешімімен оған әкімшілік қамау жазасы тағайындалып, бір жыл мерзімге көлік басқару құқығынан айырылды. Бұл туралы Qandastar.kz сайты хабарлады.
Полицияның Жедел басқару орталығының қызметкерлері жалған мемлекеттік тіркеу нөмірлік белгілері бар автокөлікті анықтаған. Көлікті тоқтатуға әрекет жасаған патрульдік полиция қызметкерлерінің заңды талабына жүргізуші бағынбай, жол қозғалысы ережелерін бұза отырып, оқиға орнынан кетуге тырысқан.
Рөлде Тараз қаласының 38 жастағы тұрғыны болған. Ол сот отырысына бірнеше рет келмегендіктен, мәжбүрлі түрде сотқа жеткізілген.
Сот істі қарау нәтижесінде жүргізушіні әкімшілік қамауға алып, бір жыл мерзімге көлік құралдарын басқару құқығынан айыру туралы шешім қабылдады.
Полиция азаматтарды жол қозғалысы ережелерін сақтауға және құқық қорғау органдары қызметкерлерінің заңды талаптарын орындауға шақырады. Заң бұзушылық жасаған және жауапкершіліктен жалтаруға тырысқан тұлғалар қолданыстағы заңнамаға сәйкес жауапқа тартылады.