Мемлекеттік қызмет – үлкен жауапкершілік пен кәсібилікті талап ететін сала. Алайда соңғы уақытта қызметке жаңадан келген кейбір жастардың көп ұзамай жұмыстан кетуі ойлантатын мәселеге айналып отыр.
Жас мамандардың пікірінше, бұған бірнеше фактор әсер етеді. Соның бірі – еңбекақының атқаратын жұмыс пен жауапкершілікке сай болмауы. Бұған қоса, қызметтік міндетіне қатысы жоқ жұмыстардың жүктелуі де мамандардың негізгі жұмысына көңіл бөлуіне кедергі келтіреді.
Мұны Арман (аты өзгертілген) есімді азаматтың мысалынан да көруге болады. Ол мемлекеттік қызметте жүрген кезінде жұмыс көлемінің көптігін, кей жағдайда жұмыс уақытынан тыс қалуға тура келгенін айтады. Сонымен қатар, түрлі қоғамдық жұмыстарға тартылып, негізгі міндеттерін уақытында орындауға үлгермеген кездері болған. Нәтижесінде ескерту алып, қызметтен кеткен. Қазір ол такси жүргізушісі болып жұмыс істейді. Оның айтуынша, қазіргі табысы отбасының қажеттіліктері мен несиесін өтеуге жеткілікті.
Бұл – бір ғана адамның мәселесі емес. Мемлекеттік қызметтен кеткен бірқатар жас мамандар жалақы, жұмыс жүктемесі, бюрократиялық рәсімдер және негізгі қызметтен тыс міндеттердің көптігін себеп ретінде атап өтеді.
Жақсы маманды жұмысқа қабылдау – мәселенің бір бөлігі ғана. Ең маңыздысы – білікті кадрды қызметте ұстап қалу. Ол үшін еңбекақының атқарылатын жұмысқа сай болуы, қызметтік міндеттердің нақты бөлінуі, кәсіби дамуға мүмкіндік және жұмыс пен жеке өмір арасындағы тепе-теңдік маңызды.
Жастардың мемлекеттік қызметке келуімен қатар, олардың осы салада ұзақ уақыт еңбек етуіне жағдай жасау да назардан тыс қалмауы тиіс. Білікті жас маманды сақтап қалу – мемлекеттік басқарудың тиімділігіне тікелей әсер ететін факторлардың бірі.
Жастар мемлекеттік қызметтен неге кетеді?
