Премьер-министр Олжас Бектенов желіде бейәдеп сөз қолдану және қорлау сипатындағы пікірлер үшін әкімшілік жауапкершілік енгізу бағытында заңнамалық түзетулер әзірленіп жатқанын мәлімдеді. Бұл туралы Qandastar.kz сайты хабарлады.
Мәжіліс депутаттары Үкімет басшысына азаматтардың сөйлеу мәдениетіне қатысты сауал жолдаған. Бұған әлеуметтік желіде тараған трансформациялық тренинг кезіндегі бейнежазба себеп болған, онда қатысушылар көпшілік алдында балағат сөздер қолданған.
Премьер-министрдің жауабына сәйкес, Әкімшілік құқық бұзушылық туралы кодекске, нақтырақ айтқанда 434-бапқа өзгерістер енгізу жоспарланған. Бұл өзгерістер онлайн платформаларда бейәдеп сөйлеу үшін жауапкершілік белгілеуді көздейді. Заң жобасын Мәжіліс биыл қарап, маусым айында талқылауға шығаруы жоспарланып отыр. Сонымен қатар, коучтар мен тренинг ұйымдастырушыларына қойылатын этикалық талаптар қолданыстағы кәсіби стандарттармен реттелетіні айтылды.