Жетісу облысында Алматы – Өскемен автожолында болған жол-көлік оқиғасы салдарынан бес адам қаза тауып, тағы екі адам ауруханаға жеткізілді. Бұл туралы Qandastar.kz сайты хабарлады.
Облыстық полиция департаментінің мәліметінше, қайғылы оқиға 26 маусым күні кешкі уақытта Алматы – Өскемен тасжолының 432-шақырымында болған. Екі жеңіл көлік соқтығысып, салдарынан екі жүргізуші мен үш жолаушы оқиға орнында көз жұмған.
Сонымен қатар екі жолаушы түрлі дене жарақаттарын алып, медициналық мекемеге жеткізілген. Оларға қажетті дәрігерлік көмек көрсетіліп жатыр.
Аталған дерек бойынша қылмыстық іс қозғалып, оқиғаның барлық мән-жайы мен себептерін анықтау үшін сотқа дейінгі тергеу жүргізілуде.
Полиция жүргізушілерге жол қозғалысы ережелерін қатаң сақтауға, белгіленген жылдамдық режимінен аспауға, қауіпсіз арақашықтықты ұстануға және рөлде барынша мұқият болуға шақырды.