Astanada 6 jasar qyzdyń ústine fýtbol qaqpasy qulap ketti

Qazir onyń jaǵdaıy – aýyr, jansaqtaý bóliminde jatyr, dep habarlaıdy Qandastar.kz  «Informbıýroǵa» silteme jasap. 

Jábirlenýshiniń ata-anasy fýtbol alańyn salǵanymen, qaýipsizdik sharalaryna nemquraıdylyq tanytqan merdigerlerdi jazalaýdy suraıdy.

Kýágerlerdiń sózinshe, tústen keıin top bolyp oınap júrgen balalardyń birine fýtbol qaqpasy qulap ketken. Aýyr mı jaraqatyn alǵan Iamýr qazirgi ýaqytta ómiri úshin arpalysyp jatyr.

– Mıyna eki ota jasaldy. Birinshisi, mıyna qan quıyldy. Sol qandy toqtatý úshin, shyǵarý úshin basyna drenaj qoıyldy. Ekinshi ota mıdyń isigi bolǵannan keıin jasaldy. Sodan soń onyń súıegin alyp tastap, plastık qoıdy. Qazir jaǵdaıy aýyr, – dedi qaıǵydan qan jutqan Iamýrdyń anasy Aqpeıil Qarataeva.

Qarshadaı qyzdyń ákesi bar kináni alańdy salǵan kompanııadan kóredi.

– Jumystaryn durys jasamaǵannyń áserinen balam osyndaı jaǵdaıǵa túsip otyr. Aldaǵy ýaqytta da jáne buǵan deıin de osyndaı jaǵdaılar kóp bolǵan. Birneshe ret bizdiń aıtýymyzǵa qaramastan, ol kisiler qulaq asqan joq. Bul jerde múlde qyzmet kórsetý bolǵan joq, – deıdi Tımýr Jumashev.

Oqys oqıǵadan keıin qaqpa tez arada qalpyna keltirilgen.