Астанадағы LRT желісінде асылып тұрған ер адам табылды

Фото: Азаттық

24 қыркүйек таңертең Астана қаласында LRT құрылысы жүріп жатқан жерде ер адам өлі табылды.

Жергілікті телеграм-арналар оқиға орнынан түсірілген видео жариялады. Онда LRT желісінің бетон тіректерінің үстіндегі жолдың сырт жағында асылып тұрған адам көрінеді.

«24 қыркүйекте «103» қызметіне қоңырау түсті. Оқиға орнында асылып тұрған ер адам өлі табылды. Оқиғаның мән-жайы белгісіз, мәйітті полиция алды», – деп хабарлады Астананың денсаулық сақтау басқармасы.

Астана полиция департаментінің хабарлауынша, 38 жастағы марқұмның кім екені анықталған. Осы жайтқа байланысты қылмыстық іс қозғалды, тергеу жүріп жатыр деді полиция. Бірақ ол марқұмның аты-жөнін жарияламады. Бұл оқиғаның жай-жапсары әзірге белгісіз.

Newtimes.kz сайты сөйлескен құрылыс нысанының күзетшісі өткен түні аумақ құлыптаулы болған деді. Оның сөзінше, сейсенбі күні таңертең әлгі адам өлі табылған жерге полиция мен арнайы қызмет өкілдері барған. Марқұмды құрылыс кранымен төмен түсірген.